ගෙවුණු දින 04ට හමුවූ ඩෙංගු රෝගීන්ගෙන් 30%ක්ම කොළඹ දිස්ත්‍රික්කයෙන් හමුවී ඇති බව ජාතික ඩෙංගි රෝග මර්දන ඒකකය කියයි. ඉකුත් දින 04 ට ඩෙංගු රෝගීන් 65 දෙනකු හඳුනාගෙන ඇත.
ගෙවුණු දින 04 ඇතුළතදී කොළඹ දිස්ත්‍රික්කයෙන් රෝගීන් 20ක් ද මැයි මාසයේදී රෝගීන් 268 දෙනකුව හමු වී ඇත.
ඉකුත් මැයි මාසයේදී රෝගීන් 863ක් අප්‍රේල් මාසයේදී රෝගීන් 1860ක් සමඟ වසරේ මේ දක්වා රෝගීන් 7873 දෙනකු හඳුනා ගත් බව ඩෙංගු මර්දන ඒකකයේ අධ්‍යක්‍ෂවරයා පැවැසීය.
කොළඹ දිස්ත්‍රික්කය ඩෙංගු රෝගීන් වාර්තා වීමේ ඉහළ අවදානමක් පවතින අතර පවතින වැසි සමග තවදුරටත් රෝගීන් වාර්තා වීම ඉහළ යාමේ දැඩි අවදානමක් ද පවතී. මෝසම් වැසි සමග බස්නාහිර, දකුණ, සබරගමුව, මධ්‍යම, වයඹ පළාත්වල සියලු දිස්ත්‍රික්කවල ඩෙංගු රෝගය පැතිරයාමේ දැඩි අවදානමක් තිබෙන බව ඩෙංගු මර්දන ඒකකයේ අධ්‍යක්ෂ වෛද්‍ය අරුණ ජයසේකර පැවැසීය.
මෙම පළාත්වල පැතිරයන ඩෙංගු රෝගය සෙසු පළාත්වලට පැතිරයාමේ අවස්ථාව තිබෙන බව ද කී අධ්‍යක්‍ෂවරයා තමන් පදිංචි පරිශ්‍ර මෙන්ම රාජ්‍ය පෞද්ගලික ආයතන පරිශ්‍ර වට පිටාව මදුරුවන් බෝවන ස්ථාන ඉවත් කර පිරිසුදු කර ගැනීමට උනන්දු විය යුතු බවද අවධාරණය කරයි.