දුම්රිය මාර්ග නඩත්තු අංශයේ සේවය කරනු ලබන සේවක පිරිස් හට කොවිඩ් -19 රෝගය වැළදීම නිසා ඇතැම් ප්‍රදේශවල දුම්රිය මාර්ගවල දෛනික නඩත්තු කටයුතු සිදුකිරීම පිළිබඳව මේ වනවිට ගැටලුකාරී තත්ත්වයක් හටගෙන ඇතැයි ශ්‍රී ලංකා දුම්රිය ස්ථානාධිපතිවරුන්ගේ සංගමයේ ප්‍රධාන ලේකම් කසුන් චාමර ජයසේකර මහතා සඳහන් කරයි.
අඛණ්ඩව ධාවනය පවත්වාගන යාම සඳහාත්, දුම්රිය මගීන්ගේ, සේවකයන්ගේ, දුම්රිය මාර්ගයේ සහ ධාවන ඇණියේ සුරක්ෂිත භාවය සඳහාත් මේ වනවිට එම ප්‍රදේශවල දුම්රිය ධාවන වේගය පැයට කිලෝමීටර් 30 සහ ඊට අඩු මට්ටමක පවත්වාගෙන යාමට දුම්රිය දේපාර්තමේන්තුව තීරණය කර ඇති බවද ඔහු සඳහන් කළේය. මෙම හේතුව මත බොහෝ දුම්රිය ප්‍රමාදවීම් සහිතව ධාවනය කෙරෙන බවත් කසුන් චාමර ජයසේකර මහතා වැඩිදුරටත් සඳහන් කළේය.