කොවිඩ් මර්දන එන්නත ලබා ගැනීමට කොතරම් දැනුවත් කළත් එය ලබා ගැනීමට ජනතාව ඉදිරිපත් නොවන බව මහජන සෞඛ්‍ය පරීක්ෂකවරුන්ගේ සංගමය සඳහන් කරයි.
එන්නත් ලබාදීම සඳහා දිවයින පුරා සෙනසුරාදා දින 4කදී විශේෂ එන්නත් මධ්‍යස්ථාන පිහිටවූ නමුත් පසුගිය සෙනසුරාදා (17 වැනිදා) ආරම්භ කළ එන්නත් මධ්‍යස්ථාන වෙතින් එන්නත ලබාගෙන ඇත්තේ පාසල් සිසුන් සියයට විස්සකටත් අඩු පිරිසක් බව එම සංගමයේ සභාපති උපුල් රෝහණ පවසයි.
එන්නත් ලබාගැනීම සඳහා පැමිණෙන වැඩිහිටියන් සියලුදෙනාම පාහේ විදේශ ගත වන්නන් වීමද විශේෂත්වයක් බවත් එසේ පැමිණෙන්නේ ද යුරෝපා රටවල් වෙත යන අය බවත් ඔහු පෙන්වා දෙයි.
මැදපෙරදිග රටවල් වෙත යන පුද්ගලයන්ට සයිනෝෆාම් එන්නත් දෙකක් ලබා ගැනීම ප්‍රමාණවත් වන බැවින් එම රටවල් වෙත යන පිරිස් වර්ධක මාත්‍රා ලබා ගැනීමට නොඑන බවද හෙතෙම පවසයි. එම නිසා විශාල එන්නත් තොගයක් විනාශ කිරීමට සිදුවනු ඇති බව ද උපුල් රෝහණ මහතා සඳහන් කළේය.