මෙරට ගෑස් හා බොරතෙල් කැණීම් කිරීම සඳහා කඩිනමින් මාර්ග සිතියමක් (Road Map) සකස් කරන ලෙස, කෝපා කමිටුව විදුලිබල හා බලශක්ති අමාත්‍යංශයේ නිලධාරීන්ට උපදෙස් ලබා දී තිබේ.
මෙරට භූමියේ අවශ්‍ය කැණීම් කර ගෑස් සහ බොරතෙල් ලබා ගැනීම සඳහා සවිස්තරාත්මකව තොරතුරු අදාළ මාර්ග සිතියමට ඇතුළත් කරන ලෙස උපදෙස් දුන් රජයේ ගිණුම් පිළිබඳ කාරක සභාව, මෙම කැණීම් කඩිනමින් කර අවසන් විය යුතු බව ත්, එය රටේ අවශ්‍යතාවක් වන බැවින් මාර්ග සිතියමක් ඉක්මනින් සකස් කරන ලෙසත් මෙසේ උපදෙස් ලබා දෙමින් සඳහන් කර ඇත.
මේ සඳහා සම්බන්ධ වන පාර්ශ්ව පිළිබඳ පැමිණ සිටි මන්ත්‍රීවරු විසින් විමසා ඇති අතර, මෙම කැණීම් සඳහා විදේශ රාජ්‍යයන්ගේ උපදෙස් අවශ්‍ය වන්නේදැයි යන්නත් විමසා ඇත.
ඊට වෙනත් රාජ්‍යයන්ගෙන් උපදෙස් අවශ්‍ය නොවන බව පැමිණ සිටි නිලධාරීන් එහිදී පෙන්වා දී තිබේ.
ලංකාවේ සැලසුම් කොට ඇති ස්වාභාවික වායු කැණීමේ ව්‍යාපෘති (LNG) පිළිබඳව සහ ඒවායේ වර්තමාන තත්ත්වය පිළිබඳ ඉදිරිපත් කිරීමක් කළ අමාත්‍යංශ නිලධාරීන් මෙම කැණීම් සඳහා විවිධ බාධා පවතින බව ද කෝපා කමිටුව හමුවේ පෙන්වා දී ඇත.