උතුරු පළාත් මහ ඇමැති සී. වී. විග්නේෂ්වරන් මහතාට අවැසි ලෙස ක්‍රියාත්මක වීමට ශ්‍රී ලංකා රජය කිසිවිටෙක සූදානම් නැතැයි සමාජ සවිබල ගැන්වීම් සහ සුබ සාධන නියෝජ්‍ය අමාත්‍ය රන්ජන් රාමනායක මහතා පවසයි.
ඉරණමඩු බුද්ධ ප්‍රතිමාව ඉදිරිකිරීම වහා නතර කරන්නැයි ඉල්ලා උතුරු පළාත් සභාව ඉකුත් දා ඒකච්ඡන්දයෙන් සම්මත කර ගත් යෝජනාව පිළිබඳව අදහස්‌ දක්‌වමින් ඔහු මේ බව කීවේය. නියෝජ්‍ය අමාත්‍යවරයා වැඩි දුරටත් මෙසේද පැවසීය.
“ඉරණමඩු කියන්නේ ද්‍රවිඩ ජනතාවගේම පළාතක්‌ කියලා සිතන එකත් ඔවුන්ගේ මෝඩ කමක්‌. පළාත් සභාවේදී යෝජනා සම්මත කළාට ඒවා එහෙම ක්‍රියාත්මක කරන්න බලයක්‌ ඔවුන්ට දීලා නැහැ. මහ ඇමැති විග්නේෂ්වරන්ට ඕනෑ විදිහට නටන්න දීලා අපි රජයක්‌ හැටියට බකන්නිලාගෙන ඉන්නේ නැහැ. මීට ප්‍රථමත් උතුරු පළාත් සභාවේ අය ප්‍රභාකරන්ගේ පිළිරූ හදන්න උත්සාහ කළා. ඒත් ඒවා උතුරේ ජනතාව අතර ජනප්‍රිය වෙන්න දඟලපු දැඟලිලි පමණක්‌ම වුණා යෑයිද රාමනායක මහතා කියා සිටියේය.
හමුදාව ඉරණමඩුවල බුද්ධ ප්‍රතිමාව හදන්නේ රජයේ ඉඩමක. ඉඩම් හා පොලිස් බලතල තියෙන්නේ අපේ රජය යටතේ. මේක සියයට හැත්තෑවක්‌ බෞද්ධයන් ජීවත්වන රටක්‌. උතුරු පළාත් සභාවේ උදවිය ‘මෝඩ චූන්’ දාලා එහේ ජනතාව රැවටුවට මහ ආණ්ඩුවට මේවා ‘වොයිස්‌ කට්‌’ විතරයි.
– දිවයින