අගමැති රනිල් වික්‍රමසිංහට එරෙහිව ඒකාබද්ධ විපක්ෂය විසින් විශ්වාසභංගයක් ගෙන ආවේ සැබැවින්ම රනිල් පරාජය කර ගෙදර යැවීමේ අදහසින් නොව, රනිල්ට සහාය දෙන මැති ඇමතිවරු හෙළිදරව් කිරීමට බව ඒකාබද්ධ විපක්ෂ මන්ත්‍රී මහින්ද යාපා අබේවර්ධන ඊයේ මාතරදී පැවසීය.
“අගමැතිවරයාට එරෙහිව අපි විශ්වාසභංග යෝජනාව ගෙනාවේ ඔහු පරාජය කරන්නවත් ඔහු ගෙදර යන්නවත් නොවෙයි.අපි දන්නවා මේක දිනන්න බැහැ කියලා.අපිට ඕන වුණේ මේකට ඡන්දේ දෙන නොදෙන අය රටට ජනතාවට හෙලි කරන්නයි. හැබැයි වැඩේ ඒ පැත්තට හැරිලා ගියොත් කරන්න දෙයක් නැහැ. යන විදිය අනුව එහෙමයි පේන්න තියෙන්නේ.” යැයි මන්ත්‍රීවරයා කීවේය.
මාතර මහ නගර සභාවේ අභිනව පුරපති රංජිත් යසරත්න මහතා ඇතුළු මන්ත්‍රී කණ්ඩායම වැඩ භාර ගැනීම සඳහා පැවති උත්සවයේදී ඔහු ඒ බව කීය.