Colombo Today Local News

වෛද්‍ය, ගුරු, දුම්රිය අද වර්ජනයේ.. හෙද, තෙල්, ජල, විදුලි ඇතුළු වෘත්තීය සමිති 150ක සහය

සයිටම් ජනසතු කිරීම ඇතුළු ඉල්ලීම් තුනක්‌ ඉටු කරන ලෙස රජයට බලකරමින් ගුරුවරු, දුම්රිය නියාමකවරු සහ වෛද්‍යවරු අද (05දා) දවස පුරා වැඩ වර්ජනය කරති.

මේ නිසා රෝහල්වල සැත්කම් කටයුතු මෙන්ම දුම්රිය ධාවනය සහ පාසල්වල ඉගැන්වීම් කටයුතු සියල්ල අද දවසේ නතර වන බව රජයේ වෛද්‍ය නිලධාරින්ගේ සංගමයේ ලේකම් වෛද්‍ය නවීන් ද සොයිසා මහතා පවසයි.

දීපව්‍යාප්තව පවත්වන මෙම එක්‌දින වර්ජනයට පසුවද තම ඉල්ලීම්වලට රජය නිසි ප්‍රතිචාර නොදක්‌වන්නේ නම් සියලු වෘත්තීය සමිති සමඟ ඒකාබද්ධ වී අඛණ්‌ඩ වැඩ වර්ජනයක්‌ ආරම්භ කිරීම සඳහා ලබන අඟහරුවාදා (09දා) දින නියම කරන බවද හෙතෙම ප්‍රකාශ කළේය.

රෝගී ජීවිත අනතුරේ හෙළන සයිටම් ආයතනය පූර්ණ ලෙස ජනසතු කිරීම, විශ්‍රාම වැටුප් අහෝසි කිරීමේ රජයේ යෝජනාව හකුළා ගැනීම, ජාතික ප්‍රතිපත්ති සම්පාදනයකින් තොරව ඉට්‌කා වෙළෙඳ ගිවිසුම අත්සන් කිරීම වැළැක්‌වීම යන ඉල්ලීම් වහා ඉටු කළ යුතු බව වර්ජකයන්ගේ ඉල්ලීම් වේ.

මෙම ඒකාබද්ධ වැඩ වර්ජනයට සහාය දක්‌වමින් ගුරුවරුන් අද ලෙඩ නිවාඩු දමමින් සේවයට වාර්තා නොකිරීමටත්, දුම්රිය නියාමකවරු සේවයෙන් බැහැරව සිට වර්ජනය කිරීමටත් තීරණය කළ බව වෛද්‍ය නවීන් ද සොයිසා මහතා කීවේය.

ඊට අමතරව හෙදියන්, ඛනිජ තෙල්, විදුලි, ජල හා තැපැල් සේවකයන් ඇතුළු තවත් වෘත්තීය සමිති එකසිය පනහක්‌ පමණ අද වැඩ වර්ජනයට උද්ඝෝෂණය කරමින් සහාය දක්‌වන බවද අඛණ්‌ඩ වැඩ වර්ජනය සඳහා ඔවුන් එක්‌වීමට එකඟ වී ඇතැයිද වෛද්‍ය නවීන් ද සොයිසා මහතා ප්‍රකාශ කළේය.

ජනතා විමුක්‌ති පෙරමුණ, ඒකාබද්ධ විපක්‍ෂය සහ පෙරටුගාමී සමාජවාදී පක්‍ෂයද වැඩ වර්ජනයට සහාය දක්‌වන බව කී වෛද්‍ය නවීන් ද සොයිසා මහතා සියලු සරසවි සිසුන් සහ වෛද්‍ය සිසුන් අද දවසේ පන්ති වර්ජනය කරමින් එක්‌දින වැඩ වර්ජනයට සහාය දක්‌වන බවද කීය.

වැඩ වර්ජනය නිසා අද දවසේ ජනතාව අපහසුතාවට පත්වීමේ සම්පූර්ණ වගකීම උසස්‌ අධ්‍යාපන ඇමැතිවරයා, සෞඛ්‍ය ඇමැතිවරයා සහ රජය භාරගත යුතු බවද හෙතෙම ප්‍රකාශ කළේය.

Related posts

පැමිණීමට පෙර රසායනික කාන්දුව ගැන ගිනිගත් නැව කොළඹ වරායට දන්වා නැහැ

colombotoday

සංචාරකයින් රැගත් ස්විස් ගුවන් යානයක් කටුනායකට

colombotoday

ශ්‍රේෂ්ඨාධිකරණය වැඩ ලබන සඳුදා සිට

colombotoday

යාපනයේ හින්දු කෝවිලක් හා දේව රූප කඩා විනාශ කරයි

colombotoday

ප්‍රධාන මාර්ගයේ දුම්රිය ධාවනය ප්‍රමාදයි

Admin

දේවදත්තට මහණ වෙන්න පුළුවන්න වුනානම් කරුණාටත් ඉතිහාසයෙන් ගැලවෙන්න පුළුවන්..

colombotoday