ඇමරිකාවේ ජනාධිපතිවරු මාරුවුවත්, ශ්‍රී ලංකාව පිළිබඳ ඇමරිකාවේ ප්‍රතිපත්තිවල කිසිදු වෙනසක් ඇති නොවනු ඇති බව දකුණු හා මධ්‍යම ආසියානු කටයුතු පිළිබඳ ඇමරිකානු රාජ්‍ය දෙපාර්තමේන්තුවේ සහකාර ලේකම් ලෙස පත්කර ඇති ඇන්ජෙලා ඇග්ලියර් ප්‍රකාශ කර ඇත.
ඇමරිකාවේ නව ජනාධිපතිවරයා ලෙස ඩොනල්ඩ් ට්‍රම්ප් දිවුරුම්දීමෙන් පසු, ඇමරිකානු රාජ්‍ය දෙපාර්තමේන්තුවේ දකුණු හා මධ්‍යම ආසියානු කටයුතු පිළිබද සහකාර ලේකම් ධූරයට ඇන්ජෙලා ඇග්ලියර් පත් කෙරිණි.
එම ධූරය භාරගැනීමෙන් පසු, ප්‍රථම වතාවට ශ්‍රීලංකාවේ සංචාරයක නිරත වෙමින් ඇය මේ බව ප්‍රකාශ කර ඇත.
ජනවාරි 24 වන වන දින මාධ්‍යවේදීන්ගේ කණ්ඩායමක් සහ ශ්‍රී ලංකා මාධ්‍ය කටයුතු පිළිබඳ නියෝජ්‍ය අමාත්‍ය කරුණාරත්න පරණවිතාන යන අය වෙන වෙනම හමුවී, තොරතුරු දැනගැනීමේ පනත සහ ශ්‍රී ලංකාවේ මාධ්‍ය නිදහස සම්බන්ධයෙන් ඇය විමසා ඇත.
ඉන් අනතුරුව ඇය සිවිල් සමාජ නියෝජිතයින් හමුවී සාකච්ඡා කර ඇති අතර තම සංචාරය අවසානයේදී ඇමරිකානූ රාජ්‍ය දෙපාර්තමේන්තුවට වාර්තාවක් ඉදිරිපත් කරනු ඇති බවද ඇමරිකානු තානාපති කාර්යාලය පවසයි.