එක්සත් ජාතීන්ගේ සංවිධානයේ 71 වැනි සැසිවාරයට සහභාගීවීමට ඇමරිකාවේ නිව්යෝක් නුවර බලා ගිය ජනාධිපති මෛත්‍රීපාල සිරිසේන මහතා ඇතුළු දූත පිරිස ඊයේ (26) පස්වරුවේ යළි දිවයිනට පැමිණියහ.
එක්සත් ජාතීන්ගේ මහා මණ්ඩලය මව් බසින් ඇමතූ ජනාධිපතිවරයා, ඇමරිකානු ජනාධිපතිවරයා, එක්සත් ජාතීන්ගේ සංවිධානයේ මහලේකම්වරයා ඇතුළු රාජ්‍ය නායකයන් කිහිප දෙනෙකු හමුවී සාකච්ඡා පැවැත්වීය. ජනාධිපතිවරයාගේ මූලිකත්වයෙන් වත්මන් රජය ක්‍රියාත්මක කර ඇති සංහිදියා වැඩපිළිවෙල රාජ්‍ය නායකයන් කිහිප දෙනෙකුගේ ප්‍රශංසාවට ලක්ව තිබුණු අතර, ජනාධිපති මෛත්‍රීගේ නායකත්වය යටතේ වත්මන් රජය ලෝකයේ හොද හිත දිනා ඇති බවට රජයේ මැති ඇතිවරුන් සහ රාජ්‍ය මාධ්‍ය වාර්තා පලක තිබිණි.
කෙසේ වෙතත් ජනාධිපතිවරයා රජයේ සංහිදියා වැඩපිළිවෙල ගැන ජාත්‍යන්තරයට කියද්දී, සංහිදියාව ගිනිබත් කරමින් උතුරු පළාත් ප්‍රධාන අමාත්‍ය සී.වී. විග්නේශ්වරන් රාජ්‍ය බලය යොදාගනිමින් උතුරු නැගෙනහිරින් සිංහල බෞද්ධයන් පළවාහරින්නැයි ඉල්ලමින්, රටේ ව්‍යවස්ථාවට, ස්වෛරීත්වයට අභියෝග කරමින් ස්වයංපාලන අයිතිය ඉල්ලන ප්‍රතිපත්ති ප්‍රකාශන එළිදක්වනු ලැබීය.
යහපාලන රජයේ ප්‍රධානම ව්‍යාපෘතිය වන සහ ජනාධිපතිවරයා විසින් නිතර උත්කර්ෂයට නංවන “සංහිදියාව“ මෙරට බහුතර ජනතාගේ ඇස් වසා දෙමළ බෙදුම්වාදය සතුටු කරවන තවත් එක් ප්‍රෝඩාකාරී ව්‍යාපෘතියක් නොවේනම්, සංහිදියාවට වින කටින විග්නේෂ්වරන් ඇතුළු බෙදුම්වාදී නඩය සම්බන්ධයෙන් ජනාධිපතිවරයා නිසි ක්‍රියාමාර්ග ගනු ඇතැයි සැබෑ සංහිදියාවකට ලැදි ජනතාව බලා සිටී.