බෞද්ධ අන්තවාදී සංවිධාන සමග සම්බන්දතා පැවැත්වීම සහ නාවික තොරතුරු පිටතට ලබාදීම ලෙස සාවද්‍ය චෝදනා ඉදිරිපත්කර මානසික පිඩාවට ලක්කර, අවමන් සහිතව නාවික හමුදාවෙන් නෙරපීමට විරුද්ධව නාවික හමුදා විදුලි කාර්මික, බලනැවි මුදිත කෞශල්‍ය සමරනායක විසින් නාවික හමුදාපති සහ ආරක්ෂක ලේකම් යන දෙදෙනා වගඋත්තර කරුවන් ලෙස නම් කරමින් ශ්‍රී ලංකා මානව හිමිකම් කොමිෂන් සභාව වෙත අද (30) පැමිණිල්ලක් ඉදිරිපත් කරනු ලැබුවා.
නිලාවේලි නාවික හමුදා කදවුරේ සේවය කරමින් සිටියදී 2016/05/12 දින තමාව නාවික හමුදාව විසින් අත්අඩංගුවට ගත් බවත් එදින සිට 2016/07/28 දින දක්වා නාවික හමුදා අත්අඩංගුවේ තබා ගත් බවත් පසුව පරීක්ෂණ 3ක් සිදුකොට අභූත චෝදනා නගමින් තමන්ව නාවික හමුදාවෙන් අවමන් සහිතව ඉවත් කල බවත් බලනැවි මුදිත කෞශල්‍ය මාධ්‍ය වෙත ප්‍රකාශ කර සිටියා.
යුද ගිනිදැල් ඇවිලෙන මොහොතක තමන් නාවික හමුදාව වෙත, රට බේරාගැනීමේ අරමුණෙන් බැදුණු බවත්, කැපවීමෙන් සේවය කල බවත්, නොසිතු ලෙස නාවික හමුදාවෙන් අවමන් සහිතව ඉවත් කිරීම කිසිලෙසකවත් දරාගැනීමට නොහැකි දෙයක් බවයි මෙහිදී වැඩිදුරටත් අදහස් දැක්වූ මුදිත කෞශල්‍ය සදහන් කර සිටියා.