Colombo Today Local News

සංශෝධන නෑ.. VAT පනත පරණ විදිහටම එයි

vatරට තුළ ඉමහත් ආන්දෝලනයට තුඩු දුන් සියයට 15 දක්‌වා එකතු කළ අගය මත බදු (වැට්‌) වැඩි කිරීමේ යෝජනාව එලෙසම අමාත්‍ය මණ්‌ඩලය හරහා යළි පාර්ලිමේන්තුවට ඉදිරිපත් කිරීමට රජය කටයුතු කරගෙන යයි.

ඒ සඳහා මුදල් අමාත්‍යාංශය දැනටමත් කටයුතු ආරම්භ කර ඇති අතර ශ්‍රී ලංකා නිදහස්‌ පක්‍ෂයේ සංශෝධන හෝ වෙනත් සංශෝධන එම බදු යෝජනාවට ඇතුළත් කරන ලෙස තවමත් කිසිදු උපදෙසක්‌ මුදල් අමාත්‍යාංශයට ලැබී නැතැයිද මේ ගැන කළ විමසුමකට පිළිතුරු දුන් මුදල් අමාත්‍යාංශයේ උසස්‌ නිලධාරියෙක්‌ කීවේය.

මේ අනුව අලුත් පනතක්‌ ලෙස අමාත්‍ය මණ්‌ඩලය හරහා පාර්ලිමේන්තුවට ඉදිරිපත් කරනු ඇත්තේ සියයට 15 දක්‌වා වැට්‌ බදු වැඩි කිරීමේ පෙර යෝජනාවම බවත්, අවශ්‍ය නම් පනත පාර්ලිමේන්තුවට ඉදිරිපත් වූ පසු කාරක සභා අවස්‌ථාවේදී සංශෝධන සිදුකර ගැනීමට අවස්‌ථාව තිබෙන බවත් එම නිලධාරියා කීවේය.

පනත ශූන්‍ය පනතක්‌ බවට උසාවිය තීන්දු කළේ නිසි ක්‍රියා පටිපාටිය අනුගමනය නොකරමින් එය පාර්ලිමේන්තුවට ඉදිරිපත් කළ නිසා බවත්, ඒ නිසා එම බදු යෝජනාවම අලුත් පනතක්‌ ලෙස නිසි පරිදි අමාත්‍ය මණ්‌ඩල අනුමැතිය ලබාගෙන පාර්ලිමේන්තුවට ඉදිරිපත් කිරීමට කිසිදු බාධාවක්‌ නැති බවද එම මුදල් අමාත්‍යාංශ නිලධාරියා කීවේය.

මෙහි විශේෂත්වය වන්නේ ශ්‍රේෂ්ඨාධිකරණයෙන් ශූන්‍යය කළ පනත් කෙටුම්පතට අනුව අතීතයේ එනම් පසුගිය මැයි 02 සිට ජූලි 11 දින දක්‌වා මහජනතාවගෙන් දැනටමත් අයකර ඇති වැඩි කළ වැට්‌ බදු මුදල්ද රජයට තබාගත හැකි වන ආකාරයට විධිවිධාන ඇතුළත්ව අලුත් පනත ගෙන ඒමට රජය කටයුතු කරගෙන යැමයි. අලුත් පනත පාර්ලිමේන්තුවට ඉදිරිපත් කොට සම්මත වුවහොත් එම අතීතයේ අයකළ වැට්‌ බදු මුදල්ද රජයට නීත්‍යනුකූලව තබාගත හැකි ආදායමක්‌ වනු ඇතැයිද පෙන්වා දුන් ඔහු, තවදුරටත් කීවේ අලුතින් ගෙන එන වැට්‌ බදු සංශෝධන පනතද අධිකරණය හමුවේ ඕනෑම අයෙකුට අභියෝගයට ලක්‌කළ හැකි බවයි.

දිවයින

Related posts

ළමා අසභ්‍ය දර්ශන අන්තර්ජාලයට යොමුකළ බඩල්කුඹුරේ තරුණයා අත්අඩංගුවට

colombotoday

නව ව්‍යවස්ථා මෙහෙයුම් කමිටුව රැස්වෙයි.. මේ සතිය තීරණාත්මකයි !

colombotoday

ජනපති රනිල්ගෙන් අඹේවෙල ගොවිපොළට තෑග්ගක්

Admin

වසර 18කට පසු ලංකා සිතියම වෙනස් වෙයි.. දකුණ, නැගෙනහිර වෙරළේ වෙනසක්..

colombotoday

සෞඛ්‍ය අමාත්‍යංශයේ වාහන 575ක් අතුරුදහන්. අමාත්‍යංශ ලේකම් පොලීසි යයි

colombotoday

ඥානසාර හිමි ධර්ම චාරිකාවේ යෙදෙති – මේ වසරේ 270 වන ධර්ම දේශනය අද හොදැල්ලදී

colombotoday