උතුරු පළාත් සභාව සම්මත කළ ද්‍රවිඩ භාෂාව කතා කරන ජනතාව වෙනුවෙන් වෙනම කලාපයක් පිහිටුවීමේ යෝජනාවට දකුණු පළාත් සභාවේ බලවත් විරෝධය ප්‍රකාශ කළ යුතු බවට යෝජනාවක් දකුණු පළාත් සභාවේ උප සභාපති සම්පත් අතුකෝරල මහතා ඇතුළු මන්ත්‍රීවරු 20 දෙනෙකුගේ අත්සනින් යුතු ව හදිසි යෝජනාවක් ඊයේ (26) පැවති දකුණු පළාත් සභා රැස්වීමට ඉදිරිපත් කර තිබේ.
එම පළාත් සභාවේ මන්ත්‍රීවරු 20දෙනෙකුගේ අත්සනින් යුතුව එම යෝජනාව ඉදිරිපත් කර ඇති බවත් එය ඊයේ (26) දිනම විවාදයට ගන්නා බව දකුණු පළාත් සභාවේ සභාපති කේ.ඒ. සෝමවංශ මහතා පැවසී ය.
එම යෝජනාව උප සභාපති සම්පත් අතුකෝරල මහතා විසින් සභාවට ඉදිරිපත් කළ අතර එම යෝජනාවට දකුණු පළාත් ප්‍රධාන ඇමති ෂාන් විජේලාල්ද සිල්වා, ඇමතිවරුවන යු.ජී.ඩී. ආරියතිලක, චන්දිමා රාසපුත්‍ර, විරසුමන විරසිංහ යන මහත්වරුන් ද අත්සන් තබා ඇතැයි වාර්තා වේ.
රට බෙදන යෝජනාවලට එජාපය විරුද්ධ බව දකණු පළාත් සභාවේ විපක්ෂනායක එස්. තෙන්නකොන් නිලමේ මහතා සඳහන් කරයි.
දකුණු පළාත් සභාවේ සභාපති කේ.ඒ. සෝමවංශ මහතාගේ ප්‍රධානත්වයෙන් පසුගිය දා දකුණු පළාත් සභාව ගාල්ල කළේගානේ පිහිටි පළාත් සභා ශ්‍රවනාගාරයේ දී පැවැත් විය.
ගාල්ල – ලලිත් චාමින්ද