බ්‍රිතාන්‍ය ඇතුළු බටහිර රටවල්වල දේශපාලකයන් ශ්‍රී ලංකාවේ බෙදා වෙන්කිරීම සදහා දෙමළ ඊළාම් ඩයස්පොරාව සමග එළිපිටම කටයුතු කරමින් රටට එරෙහිව ප්‍රකාශ කරද්දී රට වෙනුවෙන් ඒවාට පිළිතුරු දෙනවා වෙනුවට විදේශ ඇමති මංගල සමරවීර ඔවුන් සමග එකට හිදගෙන එම ප්‍රකාශ අනුමත කරමින් රටට එරෙහි පරගැති දීන ප්‍රතිපත්තියක් අනුගමනය කරමින් සිටින බව බොදු බල සේනා සංවිධානය චෝදනා කරයි.
ශ්‍රී ලංකාවේ උතුරේ වෙනම රාජ්‍යයක් ස්ථාපිත කිරීම සදහා තමන් උපරිම සහය දක්වන බවට බ්‍රිතාන්‍යයේ ප්‍රධාන විපක්ෂය වෙන ලේබර් පක්ෂයේ නායකයා කළ ප්‍රකාශයක් සම්බන්ධයෙන් අදහස් දක්වමින් අද පැවති මාධ්‍ය හමුවකදී එහි ප්‍රධාන විධායක නිලධාරී කථිකාචාර්ය දිලන්ත විතානගේ මහතා සදහන් කළේ වෙනත් රටක් සම්බන්ධයෙන් මෙවැනි ප්‍රකාශකයක් සිදුවූයේ නම් විදේශ අමාත්‍යංශය මැදිහත් වී අදාළ තානාපති අංශ කැදවා එම ප්‍රකාශ සම්බන්ධයෙන් දැඩි ක්‍රියාමාර්ග ගන්නා බවයි.
එහෙත් පරගැති මානසිකත්වයෙන් කටයුතු කරන ලංකාවේ විදේශ ඇමතිවරයා රටට එරෙහි බලවේග සමග එකට හිදිමින් ඔවුන්ගේ ප්‍රකාශ අනුමත කරමින් නිහඩව සිටින බව පවසන බොදු බල සේනා සංවිධානය, කොන්දක් තිබේනම් එම ප්‍රකාශ වලට එරෙහිව පිළිතුරු දෙන ලෙසත් විදේශ අමාත්‍යවරයාට අභියෝග කර සිටියා.