පසුගිය මාස 14 ක කාලය තුළ කොළඹ කොටස් වෙළෙඳපොළේ ප‍්‍රාග්ධන අලාභය රුපියල් බිලියන 600 ඉක්මවන බව කොටස් වෙළෙඳපොළ ආරංචිමාර්ග පවසයි.
2015 ජනවාරි 9 වන දින නව රජය බලයට පත් වන විට කොළඹ කොටස් වෙළෙඳපොළේ සමස්ත කොටස් මිල දර්ශකය ඒකක 7,605ක් වූ අතර, 2016 මාර්තු 09 වන දින උදෑසන වන විට සමස්ත කොටස් මිල දර්ශකය ඒකක 5,802 දක්වා, එනම් සියයට 23.7කින් (ඒකක 1,802කින්) පහත බැස තිබේ.
ගෝලීය ආර්ථිකය දුර්වල වීම, මුදල් ඒකක අවප‍්‍රමාණය හා පොලී අනුපාත ඉහළ යාම අවපාතයට හේතු වන බව කොටස් වෙළෙඳපොළ තැරැව්කරුවෝ කියති.
ඉපැයූ ලාභය මත බදු පැනවීම ගැන ඇමැතිවරයා පාර්ලිමේන්තුවේ දී අදහස් පළ කිරීමත් සමඟ දින දෙකක් තුළ කොටස් වෙළෙඳපොළ අගය එක්ක 200කට වැඩි ප‍්‍රමාණයකින්, එනම් සියයට හතරකින් පමණ අඩු වුණු බව ද වාර්තා වේ.
රට හමුවේ ඇති ආර්ථික අර්බුදයට වත්මන් ආණ්ඩුව පැහැදිලි විශ්වාසයකින් යුතුව මුහුණ දෙන බව පෙනෙන තෙක් හා විදේශ ආයෝජන රට තුළට ගොනැවිත් සංවර්ධනයට යොදවන තෙක් කොටස් වෙළෙඳපොළ සැලකිය යුතු වර්ධනයක් නොවනු ඇතැයි ද එම තැරැව්කරුවෝ කියති.
වරාය නගර ව්‍යාපෘතිය නැවත ආරම්භ කිරීම, පොලී අනුපාත හා මුදල් ඒකක අගය ස්ථාවර කිරීම වැනි පියවර ද එවැනි වර්ධනයකට හේතු වනු ඇති බව ඔවුන්ගේ අදහසයි.
(රාවය)