වන්නි දිස්ත්‍රික්කය සංවර්ධනය කිරීම සඳහා අමාත්‍ය රිෂාඩ් බද්යුදීන් මහතා අරමුදල් සම්පාදනය කර ගන්නා අයුරු තමන් නොදන්නා බව අග්‍රාමාත්‍ය රනිල් වික්‍රමසිංහ මහතා පවසයි.
ඊයේ (14දා) වව්නියාවේ පැවැති උත්සවයක් අමතමින් ඔහු මේ බව ප්‍රකාශ කළේය.
“මේ ප්‍රදේශයේ (වන්නි) ඇමති ලෙස රිෂාඩ් බද්යුදීන් මහතා විශාල සේවයක් කරගෙන යනවා. කොහෙන්ද මුදල් හොයන්නේ කියලා මමවත් දන්නේ නෑ. දැන් මන්නාරමටත් නවීන රෝහලක් දෙන්න තමයි සිදුවෙලා තිබෙන්නේ. ඒකත් කරනවා. මුළු වන්නියේම අලුත් රෝහල් ක්‍රමයක් ඇතිවෙන්න යනවා.
මේ රටට ආහාර සපයන විශාලම ප්‍රදේශයක් ලෙසට වන්නිය හඳුනාගෙන තිබෙනවා. වන්නියට ඕක සම්ප්‍රදායික කාෂිකර්මය නෙමෙයි. අපි නවීන කෘෂිකර්මය මෙහාට ගෙනෙන්න තිබෙනවා.
ඒ නිසා මතක තියා ගන්න වන්නිය සංවර්ධනය කරන්න ඕන. සංවර්ධනය කරන අයත් එක්ක යන්න ඕන. අවුරුදු පහක් වන්නිය අමතක කරපු අයට දෙන්න (ඡන්දය) එපා.”