ශ්‍රී ලංකා පොදුජන පෙරමුණේ නායකයා ජී.එල්. පීරිස් මහතා නොව හිටපු ජනාධිපති මහින්ද රාජපක්ෂ මහතා බව එම පක්ෂය පවසයි.
බත්තරමුල්ල නෙළුම් මාවතේ පිහිටි ශ්‍රී ලංකා පොදුජන පෙරමුණේ ප්‍රධාන කාර්යාලයේ අද (22දා) පැවති මාධ්‍ය හමුවකට එක්වෙමින් එම පක්ෂයේ සභාපති මහාචාර්ය ජී.එල්.පීරිස් මහතා සඳහන් කළේ මේ අවස්ථාවේදී ජනප්‍රියම නායකයා මහින්ද රාජපක්ෂ මහතා බවයි.
මෙම මාධ්‍ය හමුවට එක්වූ එම පක්ෂයේ ප්‍රධාන ලේකම් නීතිඥ සාගර කාරියවසම් මහතා සඳහන් කළේ ජනාධිපති මෛත්‍රීපාල සිරිසේන මහතා විසින් ජී.එල්.පීරිස්ගේ පක්ෂය ලෙස පොදුජන පෙරමුණ හඳුන්වන බවයි.
පොදුජන පෙරමුණේ නම පැවසීමට පවා ජනාධිපතිවරයා බියවී සිටින බවද හෙතෙම කීවේය.
මෙහිදී අදහස් දැක්වූ ජී.එල්.පීරිස් මහතා වැඩිදුරටත් සඳහන් කළේ ජනාධිපති මෛත්‍රීපාල සිරිසේන මහතා එක්සත් ජාතික පක්ෂයේ ඡන්ද පදනම අඩු කිරීමට උත්සාහ කරමින් සිටින බවත්, මෙය ශ්‍රී ලංකා පොදුජන පෙරමුණේ මැතිවරණ ව්‍යාපාරයට වාසිසහගත බවත්ය.
(අද)