සිංහල ජාතික පුරුෂයෙකු සමග විවාහ වීම හේතුවෙන්, ප්‍රදේශයේ මුස්ලිම් පල්ලියේ පිරිස්වල අඩත්තේට්ටමට ලක්වූ “අබ්දුල් හසන් ෆාතුමා හයිෆා” නැමති කාන්තාව විසින් බණ්ඩාරගම පොලිසියට සිදු කළ පැමිණිලි මත පානදුර අධිකරණයේ විභාගවන B 64499/19 දරණ නඩුව අද(2) දින යලි කැඳවීය.
ඊයේ(1) තවත් සැකකරුවන් දස දෙනෙකු පමණ මිරිහාන විශේෂ අපරාධ ඒකකයට බාර වීමෙන් පසුව අද(2) දින අධිකරණයට ඉදිරිපත් කිරීමෙන් අනතුරුව ඔක්තෝබර් 9 දින දක්වා රක්ෂිත බන්ධනාගාර ගත කරන ලදි. මෙම නඩුවට අදාලව තවත් සැකකරුවන් 4 දෙනෙකු අධිකරණය මග හරිමින් සිටියි.
අගතියට පත් පාර්ශවය වෙනුවෙන් නීතිඥ සංජය ආරියදාස සහ නීතිඥ සංජය මාරබේ පෙනී සිටින ලදි.
මෙම නඩුවට අදාලව මීට ඉහතදී සැකකරුවන් 6 දෙනෙකු අත්අඩංගුවට ගත් අතර අනෙකුත් සැකකරුවන් ප්‍රදේශයෙන් පලා යාම හේතුවෙන් අත්අඩංගුවට ගැනීමට නොහැකි වී ඇති බව එම අවස්ථාවේදී බණ්ඩාරගම පොලීසිය අධිකරණයට දැන්වීය. කෙසේවෙතත් බණ්ඩාරගම පොලිසිය විසින් සිදුකරන පරීක්ෂණවල අපක්ෂපාතිත්වය පිළිබඳව මතුවූ ගැටළු හේතුවෙන් මෙම අපරාධයේ පරීක්ෂණ මිරිහාන විශේෂ විමර්ශන ඒකකයට මාරු කර යවන ලෙස මහේස්ත්‍රාත්වරයා නියෝග කරන ලදි.