අග්‍රාමාත්‍ය රනිල් වික්‍රමසිංහ මහතා සහ ජනතා විමුක්ති පෙරමුණේ නායක අනුර කුමාර දිසානායක මහතා අතර ප්‍රබල ගැටුමක් ඇතිවී තිබෙන බව දේශපාලන ආරංචි මාර්ගවලින් වාර්තා වෙයි.
පසුගිය සෙනසුරාදා කතානායක කරු ජයසූරිය මහතාගේ ප්‍රධානත්වයෙන් පාර්ලිමේන්තුවේ කතානායක කාර්යාලය්දී පැවති පක්‍ෂනායක රැස්වීමේදී මේ මත ගැටුම දැඩි උණුසුම්කාරී ලෙස සිදුව තිබේ.
පාර්ලිමේන්තුව ආණ්ඩුක්‍රම ව්‍යවස්ථා මණ්ඩලයක් බවට පත්කිරීමේ යෝජනාව සහ ඊට අදාළ විවාදය පිළිබඳ මේ මත ගැටුම සිදුවී ඇත. ආණ්ඩු පක්‍ෂයේ පාර්ලිමේන්තු මන්ත්‍රි කණ්ඩායම් රැස්වීමේ සිට හදිසියේ පක්‍ෂ නායක රැස්වීමට පැමිණි අග්‍රාමාත්‍යවරයා අදහස් ප්‍රකාශ කිරීමත් සමඟ දෙදෙනා අතර මත ගැටුම ආරම්භ වී ඇත.
එහිදී අග්‍රාමාත්‍ය රනිල් වික්‍රමසිංහ මහතා අනුර දිසානායක මහතාට ප්‍රකාශ කර ඇත්තේ අනෙක් පක්‍ෂ ඔක්කොම එකතුවෙලා තියෙද්දී එක් පක්‍ෂයකට විතරක් මෙහෙම තුවක්කුවක් එල්ල කරන්න දෙන්න බැහැ’ යනුවෙනි.
ඊට ප්‍රතිචාර දක්වමින් දිසානායක මහතා කියා ඇත්තේ ‘මුදල් ඇමැති අය-වැය ඉදිරිපත් කළොත් ඊට පසුවැනිදා අය-වැය විවාදය ආරම්භ වෙනවා.එහෙත් මෙතැනදී අපේ මතය ඉදිරිපත් කරන්න 26 වැනිදා වෙනකන් බලාගෙන ඉන්න වෙනවා. ඒක හරිම අසාධාරණයි. අපේ මතය මෙහෙම යටපත් කරන්න හදන එකට අපි විරුද්ධයි යනුවෙනි.
ඩබ්ලිව්.කේ. ප්‍රසාද් මංජු