රට අභ්‍යන්තරයේ කුමන විවේචන එල්ල වූවද නව රජයේ වැඩපිළිවෙලට සමස්ථ ලෝකයේම ආශිර්වාදය හිමිව ඇති බව ජනාධිපති මෛත්‍රීපාල සිරිසේන මහතා පවසයි.
මේ හේතුවෙන් සිදුකළ යුත්තේ දේශපාලන අවස්ථාවාදීන්ගේ විවේචනවලට පිළිතුරු බදිමින් සිටීම නොව රටක් ජනතාවත් වෙනුවෙන් භාරගත් වැඩකොටස නිසි ලෙස ඉටු කිරීම බවද පොළොන්නරුවේ පැවති උත්සවයකට එක්වෙමින් ජනාධිපතිවරයා පැවසීය.
වර්තමානය වන විට ශ්‍රී ලංකාවේ සංවර්ධන කටයුතු වෙනුවෙන් අතහිත ලබාදීමට ජාත්‍යන්තරයේ ඇත්තේ තරඟකාරීත්වයක් බව එහිදි සඳහන් කළ ජනාධිපතිවරයා රජයේ යහපත් රාජ්‍ය පාලනය සහ විදේශ පිළිවෙත ඊට ඉවහල් වී ඇති බව පවසා සිටියේය.
වසර 43කට පසුව මෙරට රාජ්‍ය නායකයෙකුට ලැබුණු පළමු නිල ආරාධනය සනිටුහන් කරමින් ලබන මාසයේ ජර්මනියේ නිල සංචාරයක් සඳහා තමාට ඇරයුම් ලැබී ඇති බව ද වැඩිදුරටත් අදහස් දක්වමින් ජනාධිපති මෛත්‍රීපාල සිරිසේන මහතා ප්‍රකාශකර තිබේ.