මීලඟ ජනාධිපතිවරණය ලබන නොවැම්බර් මස 15 වෙනිදාත් දෙසැම්බර් මස 7 වෙනිදාත් අතර දිනෙක පැවැත්වෙන බව මැතිවරණ කොමිෂන් සභාවේ සභාපති මහින්ද දේශප්‍රිය මහතා පවසා ඇත.
ජනාධිපතිවරණයට නාම යෝජනා කැඳවීම ලබන ඔක්තෝබර් 20 හෝ ඊට පෙර සිදු කල යුතු බව දේශප්‍රිය මහතා පැවසුවේය. ඉදිරි ජනාධිපතිවරණය පැවැත්වීමේ මූලික කටයුතු ලබන අගෝස්තු මාසයේදී ආරම්භ කරන බවද ඔහු සඳහන් කලේය. ජනාධිපතිවරණය නොවැම්බර් මාසයේ අවසානයේ පැවැත්වීමට නීතියෙන් බධාවක් නැති හෙයින් පළාත් සභා මැතිවරණය පැවැත්වීමේ නීතිමය බාධා ඉවත් කර ගැනීම සඳහා කොමිසම උපරිම උත්සාහ ගන්නා බවද ඔහු කීය.
පළාත් සභා මැතිවරණය පැවැත්වීම ජනාධිපතිවරණය පැවැත්වීමට බාධාවක් නොවන බවද ඒ අනුව මේ වසරේ ඉදිරි මාස කිහිපය තුල මැතිවරණ දෙකම පැවැත්වීමට වුවද කොමිසම සූදානම් බව මහින්ද දේශප්‍රිය මහතා කීය.
පළාත් සභා මැතිවරණය හොරු අරගෙන ඇතැයිද කී මහින්ද දේශප්‍රිය මහතා ඇතැම් පිරිස් පළාත් සභා මැතිවරණයට හොරකම් කිරීමට අනුබල ලබා දී ඇතැයිද පැවසීය. මේ අතර ආණ්ඩුක්‍රම ව්‍යවස්ථාවට අනුව නව ජනාධිපතිවරයා 2020 වසරේ ජනවාරි මස 08 වැනිදින හෝ ඊට පෙර ධූරයේ දිවුරුම් දිය යුතුය.