මුදල් අමාත්‍ය මංගල සමරවීර මහතාට විරෝධය පළ කරමින් මාතර මහ නගර සභාවේ ශ්‍රී ලංකා පොදුජන පෙරමුණේ මන්ත්‍රීවරු අත් වල කලු පටි පැලඳ විරෝධතා පා ගමනකින් අද (11) මාසික සභා රැස්වීමට සහභාගි විය.
විශේෂයෙන්ම මංගල සමරවීර මහතා පසුගියදා සිදු කල ආන්දෝලනාත්මක ප්‍රකාශ ජාතිවාදය ඇති වීම සඳහා හේතු වු බවට ඔවුන් චෝදනා කලහ.
විශේෂයෙන්ම එම මන්ත්‍රීවරු මුදල් අමාත්‍යවරයාට එරෙහි සටන් පාඨ කියමින් මාතර මහ නගර සභාවේ ප්‍රධාන දොරටුවෙන් ඇතුළු වී විරෝධතා බැනරයක් ප්‍රදර්ශනය කරමින් රැස්වීම් ශාලාවට ඇතුළු වූහ.
මෙහිදී අදහස් දැක්වු නාගරික මන්ත්‍රී මලිදු ගජධීර මහතා මෙසේ කීය.
“පසුගිය කාලය පුරාවටම මංගල සමරවීර ඇමතිවරයා ජාතිවාදය අවුස්සවන ප්‍රකාශ රැසක් සිදු කලා. අද නවතියි කියා බලන් හිටියත් ඔහු දිගින් දිගටම මහා සංඝරත්නයට අපහාස කරමින් ආගම්වාදය ඇති කරන්න කටයුතු කළා.
ශ්‍රී ලංකාව බෞද්ධ රටක් නොවන බව කියා ජාතිවාදය වපුරන ලද මංගල සමරවීර ජාතීන් අතර සුහදතාවය පෙන්වන්න කියා විරෝධතා පවත්වනවා. මේක මහ විහිලුවක්. ඒ වගේම කාදිනල්තුමාට අපහාස කරනවා. ඔහුගේ මේ ජාතිවාදී ප්‍රකාශ තවම නතර කර නැහැ. සාමාන්‍ය මිනිසෙකු එවැනි ප්‍රකාශයක් කලා නම් මේ වෙනකොට හිරේ දාලා. ඒත් මංගලට මේ රටේ නීතිය ක්‍රියාත්මක වන්නේ නැහැ. අපි ජනාධිපතිවරයාගෙන් ඉල්ලා සිටිනවා මේ ඇමතිවරයාගේ වාග් ප්‍රහාර නතර කරලා ඔහුට විරුද්ධව නීතිය ක්‍රියාත්මක කරන්න කියලා. එම ප්‍රකාශ අපි පිළිකුලෙන් හෙළා දකිනවා.”