මෙක්සිකෝවේ උද්ඝෝෂකයින් පිරිසක් එරට ජනපති මැදුරේ ප්‍රධාන දොර, කැබ් රථයක් හප්පවා පෙරළා දමා තිබේ.
2014 වසරේදී සිසුන් 43ක් අතුරුදන් කිරීමේ සිද්ධියට විරෝධය දක්වමින් එම පිරිස උද්ඝෝෂණය කර තිබුණි.
සමාජ මාධ්‍යයේ සංසරණය වන වීඩියෝවක දැක්වෙන්නේ සුදු පාට කැබ් රථයක් ජනපති මැදුරේ ප්‍රධාන දොරටුවේ හප්පන බවය.
එම අවස්ථාවේ ජනාධිපති Andres Manuel Lopez Obrador එම පරිශ්‍රය තුළ දෛනික මාධ්‍ය හමුවට එක්වෙමින් සිටි බව විදෙස් මාධ්‍ය වාර්තා කළේය.
ඊයේ (06) උදෑසන එම සිද්ධිය සිදුවී තිබුණි.
උද්ඝෝෂකයින් පාලනය සඳහා පොලීසිය විසින් කඳුළු ගෑස් ප්‍රහාර එල්ලකළ බවත් ජනපති මැදුර තුළට උද්ඝෝෂකයින් පැමිණීම වැළැක්වීමට ආරක්ෂක බාධක ස්ථාපනය කළ බවත් වාර්තා වෙයි.
මෙම විරෝධතාවය සඳහා 100ක පමණ පිරිසක් එක්වී ඇති අතර ජනපති මැදුරට හානිකළ පිරිස අත්අඩංගුවට ගත් බවත් සඳහන් වේ.