හිටපු අමාත්‍ය රිෂාඩ් බදුර්ඩින් මහතාගේ බොරැල්ල නිවසේ මෙහෙකාර සේවයේ යෙදි සිටියදි සිරුරට ගිනි ඇවිලිමෙන් මිය ගිය අවු 16 හැවිරිදි ඉෂාලිනිගේ සිද්ධිය සම්බන්ධයෙන් පොලිසිය විසින් අත්අඩංගුවට ගත් සැකකරුවන්ට අධිකරණය හමුවේ උපරිම දඩුවම් ලබාදෙන ලෙස බල කරමින් ඩයගම ප්‍රදේශයේ වතුකම්කරුවන් පිරිසක් (27) දින උද්ඝෝෂණයක නිරත විය.
ඩයගම වතුයායෙන් ආරම්භ කල උද්ඝෝෂණය ඩයගම නගරය වෙත පාගමනින් පැමිණ මිය ගිය ඉෂාලිනි දැරිය මිහිදන් කල එම වතු යායේ සුසාන භුමිය දක්වා ගමන් කර උද්ඝෝෂනයේ නිරතව සිටි වතු කම්කරුවන් පිරිසක් ඉෂාලිනිගේ දේහය තැන්පත් කර ඇති සොහොන මත ඉටි පහන් දල්වා පින් අනුමෝදම් කරනු ලැබුහ.
උද්ඝෝෂණයේ නිරතව සිටින ඩයගම වතු යායේ වතු කම්කරුවන් කියා සිටින්නේ සිද්ධියට සම්බන්ධ තවත් අය වේ නම් එම අයද තරාතිරම නොබලා අත්අඩංගුවට ගෙන එම අයටද අධිකරණය හමුවේ දඩුවම් ලබාදෙන ලෙසයි.
වතු ආශ්‍රිත ළමුන් මෙහෙකාර සේවයේ යෙදවිම නතර කිරිමට අවශ්‍ය පියවර ගන්නා ලෙසද උද්ඝෝෂනයේ නිරතව සිටි ඩයගම ප්‍රදේශයේ වතු කම්කරුවන් ඉල්ලා සිටියි.
හැටන් – රංජිත් රාජපක්ෂ