මහ බැංකු බැඳුම්කර ජනාධිපති කොමිසම් වාර්තාවේ සී 350 ලේඛනය ප්‍රසිද්ධ කිරීමෙන් විමර්ශනවලට අගතියක් සිදු නොවන බව නීතිපතිවරයා විසින් ජනාධිපති ලේකම්වරයා වෙත දැනුම්දී තිබේ.
ජනාධිපති කොමිසම් වාර්තාවේ මෙතෙක් ප්‍රසිද්ධියට පත් නොකළ වාර්තා ප්‍රසිද්ධියට පත් කරන ලෙස පාර්ශව කිහිපයක්ම ජනාධිපති ලේකම්වරයාගෙන් ඉල්ලීම් කර තිබුණි.
අදාළ වාර්තා ප්‍රසිද්ධ කිරීමෙන් බැඳුම්කර ගණුදෙනුව සම්බන්ධයෙන් සිදු කෙරෙන විමර්ශනවලට බාධා එල්ලවිය හැකි බැවින් ඒවා ප්‍රසිද්ධ කිරීම සම්බන්ධයෙන් නීතිපති උපදෙස් මත කටයුතු කරන බව ජනාධිපති ලේකම් ඔස්ටින් ප්‍රනාන්දු මහතා පසුගියදා ප්‍රකාශ කළේය.
ඒ අනුව කොමිසම් වාර්තාවේ සී 350 ලේඛනය ප්‍රසිද්ධ කිරීමෙන් සිදු කෙරෙමින් පවතින විමර්ශනවලට අගතියක් සිදු නොවන බවට නීතිපතිවරයා අද දිනයේ ජනාධිපති ලේකම්වරයා වෙත දැනුම්දී ඇති බව ජනාධිපති ලේකම් කාර්යාලය පැවසුවේය.
කෙසේවෙතත් කොමිසම් වාර්තාවේ සී 350 සිට සී 360 දක්වා ඇමුණුම් ජනාධිපති ලේකම් කාර්යාලයේ නිලධාරීන් විසින් පසුගිය අගහරුවාදා දිනයේ කථානායක කරූ ජයසූරිය මහතා වෙත බාරදී තිබුණි.