පසුගිය 3 වැනිදා”රට වනසපු හොරු වළපල්ල තොග පිටින් හෙළිදරව්ව” මැයෙන් ජනතා විමුක්ති පෙරමුණේ නායක අනුර කුමාර දිසානායක මහතා විසින් පැවැත්වූ මාධ්‍ය හමුවේදී නීතිඥ සංගමයේ ලේකම් නීතිඥ ඉසුරු බාලපටබැඳී මහතාගේ පියා වන ජගත් බාලපටබැඳී මහතාට අල්ලස් චෝදනා තිබෙන බව පවසමින් ප්‍රහාරයක් එල්ල විය.
අල්ලස් හෝ දුෂණ කොමිෂන් සභාවේ සභාපති බාලපටබැඳී මහතා අල්ලසක් ගෙන ඔහු සභාපතිත්වය දරන අල්ලස් කොමිසමේම පැමිණිල්ලක් තිබෙන බවත් අදාළ පැමිණිල්ල වාහනයක් එකලස් කිරීමේ නිදහස් කිරීම වෙනුවෙන් තිබෙන බවත් සඳහන් කර සිටි ජවිපෙ නායකයා “අපේ රට මේ දුෂණයේ අල්ලසේ ගොදුරක් වුනු අහිංසක දුපතක්” යැයි හැඳින්වීය.
අනුර කුමාර දිසානායක මහතා විසින් අදාළ චෝදනාව එල්ලකරන අවස්ථාවේදී නීතිඥ සංගමයේ විධායක කමිටු සාමාජික නීතිඥ උපුල් කුමාරප්පෙරුම ද එම ස්ථානයේ සිටීම විශේෂත්වයකි. ඔහු 2015 වසරේ පැවති මැතිවරණය සඳහා පාස්කු ප්‍රහාරයට සැකපිට අත්අඩංගුවේ සිටින දෙමටගොඩ ඊබ්‍රහිම් සමග එකට ජනතා විමුක්ති පෙරමුණේ ජාතික ලැයිස්තුව නියෝජනය කළ නීතිඥවරයෙකි.
අරගලකරුවන් වෙනුවෙන් නීතිඥ සංගමය සෘජු ලෙස පෙනී සිටිමින් සිටින අවස්ථාවක, වෙනත් ලිපිගොනු විශාල ප්‍රමාණයක් තිබියදී හිටපු ශ්‍රේෂ්ඨාධිකරණ විනිසුරු සහ හිටපු අල්ලස් කොමිසමේ සභාපති ජගත් බාලපටබැඳී මහතා ඉලක්ක කිරීමේ යටි අරමුණ නීතිඥ සංගමයේ ලේකම් ධුරයේ කටයුතු කරන ඉසුරු බාලපටබැඳී මහතා අපහසුතාවයට පත් කිරීම බව බොහෝ දෙනා පවසයි.