අඩු ආදායම් ලාභී පවුල් සඳහා වෙළඳ අමාත්‍යංශය විසින් ලබාදුන් මැල්සිරිපුර කොස් කැලයේ වෙළඳ සැල් අනවසර බව පවසමින් එම වෙළඳ සැල් ඉවත් කිරීමට වන සංරක්ෂණ දෙපාර්තමේන්තුව විසින් නඩු පවරා තිබෙනවා.
කොරෝනා උවදුර සමග දැඩි අසීරුතාවයට පත්ව සිටින අඩු ආදායම් ලාභී පවුල් මෙම තීරණයත් සමග ජීවත්වීමේ අර්බුදයකට පත්ව ඇත.
2001-2002 වසරේදී එවකට වෙළඳ අමාත්‍යව සිටි බන්දුල ගුණවර්ධන අමාත්‍යවරයා විසින් මෙම වෙළඳ සැල් සහිත “තුරු සෙවන” වෙළඳ පියස ජනතාවට ලබා දී එහි පරිපාලනය ප්‍රාදේශීය ලේකම් කාර්යාලයට බාරදී ඇත. පසුව ප්‍රාදේශීය ලේකම් කාර්යාලය විසින් එහි පරිපාලනය ප්‍රාදේශීය සභාවට බාරදී ඇති අතර එහි වෙළඳාම් කරන පුද්ගලයින් ප්‍රාදේශීය සභාවට බදු ගෙවමින් තම වෙළඳාම් කටයුතු කරගෙන ගොස් ඇත.
වෙළඳසැල් මහා මාර්ග දෙපාර්තමේන්තුවට අයිති මාර්ග රක්ෂිත භුමියේ පිහිටා ඇති අතර එවන් පසුබිමක වන සංරක්ෂණ දෙපාර්තමේන්තුව විසින් අදාළ ඉදිකිරීම් “අනවසර ඉදිකිරීම්” ලෙස හඳුන්වමින් එම භූමියෙන් වෙළෙන්දන් ඉවත් කරන ලෙස ඉල්ලමින් කුරුණෑගල අධිකරණයේ නඩු පවරා ඇත.