සමාජ මාධ්‍ය ජාලා උපයෝගී කරගෙන තමන්ට විරුද්ධව වැරැදි තොරතුරු සමාජ ගත කිරීම මගින් සිදුවී ඇති අපහාසයට සහ පීඩාවට වන්දි ලෙස රුපියල් ලක්ෂ 200ක මුදලක් ගෙවන ලෙස පුත්තලම දිසා ලේකම් චන්ද්‍රසිරි බණ්ඩාර නීතිඥයකු මගින් ස්වාමීන් වහන්සේ නමකට එන්තර වාසියක් යවා ඇත.
නීතිඥවරයා මෙම එන්තරවාසිය යවා ඇත්තේ මාම්පූරිය – දළුව ප්‍රදේශයේ විහාරස්ථානයක වැඩ වාසය කරන මිගෙට්ටුවත්තේ සුමිත්ත නම් ස්වාමීන් වහන්සේටය.
පුත්තලම දිස්ත්‍රික් පාර්ලිමේන්තු මන්ත්‍රීවරයකුට නිසි පටිපාටියකින් තොරව රජයේ ඉඩම් ලබා දීමට සුදානම් වන බව සහ සෙල්ලන්කන්දල් රක්ෂිතය වැනසීමට දිසා ලේකම්වරයා කටයුතු කරන බව සඳහන් කරමින් ඡායාරූපද සහිතව පසුගිය නොවැම්බර් මස 8 වැනිදා හෝ ඊට ආසන්න දිනයකදී මුහුණු පොතෙන් මෙම ප්‍රචාරයන් කර ඇතැයි නීතිඥවරයා එම ස්වාමින් වහන්සේට යවා ඇති එන්තරවාසියේ සඳහන් වේ.
කීර්තිමත් රාජ්‍ය සේවකයකු වන තම සේවාදායකයාට මේ මගින් අපහාසයකට, අපහසුතාවට මෙන්ම ලජ්ජාවට පත්වීමට සිදුව ඇති බවද ඒ අනුව සිදුවී ඇති හානිය වෙනුවෙන් දින 14 ක් ඇතුළත රුපියල් ලක්ෂ 200 ක මුදලක් ගෙවීමට අපොහොසත් වුවහොත් නීති මගින් කටයුතු කරන බවද නීතිඥවරයා එහි සඳහන් කර ඇත.