සෞඛ්‍ය බලධාරීන්ගේ අවසරයකින් තොරව කෑගල්ලේ නිවසක පැවැත්වු දානමය පිංකමකට සහභාගී වු 21 දෙනෙකුට කොවිඩ් – 19 ආසාදනය වී ඇති බවට ඊයේ (06)දින හඳුනාගෙන තිබේ.
පසුගිය දෙසැම්බර් 29 වැනිදා එම දානමය පිංකම පවත්වා තිබුණි.
ඊට සහභාගී වූ සිව්දෙනෙකුට කොවිඩ් රෝග ලක්ෂණ පෙන්නුම් කිරීම නිසා සිදුකළ PCR පරීක්ෂණයෙන් ඔවුන් කොවිඩ් ආසාදිතයින් ලෙස හඳුනාගෙන ඇත.
ඒ අනුව සෙසු පිරිස PCR සහ ඇන්ටිජන් පරීක්ෂණ සඳහා යොමු කිරීමේදී ද ඔවුන්ගෙන් තවත් 17 දෙනෙකුටත් වෛරසය ආසාදනය වී ඇතැයි හඳුනාගෙන තිබේ.
මෙම ආසාදිතයින්ගේ ආශ්‍රිතයින් දෙදෙනෙකුටත් ඊයේ කොවිඩ් ආසාදනය වී ඇති බවට හඳුනාගත් බව ප්‍රදේශය භාර සෞඛ්‍ය අංශ වැඩිදුරටත් සඳහන් කරයි.
මේ අතර පොළොන්නරුව කදුරුවෙල නගරයේ ව්‍යාපාරිකයින් 8 දෙනෙකු කොවිඩ් ආසාදිතයින් ලෙස හඳුනාගැනීමත් සමග ඊයේ පස්වරුවේ සිට නගරයේ කොටසක් වසා දැමීමට සෞඛ්‍ය අංශ පියවරගෙන තිබුණි.
මේ වනවිට කදුරුවෙල නගරයේ ව්‍යාපාරිකයින් 20 දෙනෙකුට කොවිඩ් ආසාදනය වී තිබේ.