අධිවේගී මාර්ගයේ බස්නාහිර පළාතෙන් පිටවීමේ දොරටුවලදි අහඹු කොරෝනා පරීක්ෂණ සිදුකිරීම ආරම්භ කර තිබේ.
නියෝජ්‍ය සෞඛ්‍ය සේවා අධ්‍යක්ෂ ජනරාල්, විශේෂඥ වෛද්‍ය හේමන්ත හේරත් මහතා පැවසුවේ, පළාත් බලධාරීන් විසින් තෝරා ගත් පිටවීමේ දොරටුවලදී මෙම අහඹු පරීක්ෂණ සිදු කරනු ඇති බවයි.
රථවාහන අධිවේගී මාර්ගයට ඇතුළු කිරීමෙන් පසු මග නවතා අහඹු පරීක්ෂණ සිදු කිරීම ප්‍රා‌යෝගික නොවන බව ද නියෝජ්‍ය සෞඛ්‍ය සේවා අධ්‍යක්ෂ ජනරාල්වරයා පැවසී ය.
බස්නාහිර පළාතෙන් පිටතට යන පුද්ගලයින් සඳහා කොරෝනා පරීක්ෂණ සිදු කිරීම ආරම්භ වූයේ, පසුගිය 18 වැනිදා සිටයි.
එදින බස්නාහිර පළාතෙන් පිටතට යාමට සූදානම්වූවන් අතරින් 431 දෙනෙකු අහඹු ලෙස පරීක්ෂාවට ලක් කළ අතරින් ඉන් 5 දෙනෙකු කොවිඩ් ආසාදිත බවට හඳුනා ගැනිණ.
ජංගම පරීක්ෂක ස්ථාන යොදවා මෙම පරීක්ෂණ සිදු කරන අතර නියෝජ්‍ය සෞඛ්‍ය සේවා අධ්‍යක්ෂ ජනරාල්වරයා අද (22)දින පැවසුවේ, ප්‍රධාන මාර්ග ආශ්‍රිතව අහඹු පරීක්ෂණ සිදු කරන ස්ථාන ඉදිරියේදී වෙනස් කරමින් පරීක්ෂණ සිදු කරන බවයි.