ශ්‍රී ලංකාවේ උපත ලබා ඇති අංජලී ද සිල්වා ඔස්ට්‍රේලියාවේ වික්ටෝරියාහි පැවැති පළාත් පාලන මැතිවරණයේදී මොනෑෂ් නගර සභාවට මන්ත්‍රීවරියක ලෙස තේරී පත්ව ඇත. වික්ටෝරියා ප්‍රාන්තයේ පළාත් පාලන ආයතනයකට තේරී පත්වූ පළමු ශ්‍රී ලාංකිකයා වන්නේ අංජලීය.
අංජලී මොනෑෂ් නගර සභාවට තේරී පත්ව ඇත්තේ හරිත පක්ෂයෙනි. ඒ අනුව ඉදිරි සිව් වසරක කාලයේදී ඇය මොනෑෂ් වෙත සේවය කිරීමට නියමිතය. එහිදී ඇගේ කාර්යභාරයේ කොටසක් ලෙස මොනෑෂ් නගර සභාවේ ස්ත්‍රී පුරුෂ සමානාත්මතා කමිටුවේ සහ බහු සංස්කෘතික උපදේශන කමිටුවේ සාමාජිකාවක ලෙස ඇය කටයුතු කරනු ඇත.
සිය බාල සොයුරිය වන සරනි සහ මාපියන් සමග අංජලී ඔස්ට්‍රේලියාවට සංක්‍රමණය වී ඇත්තේ සිව් හැවිරිදි වියේදීය. අංජලී මෙල්බර්න් විශ්වවිද්‍යාලයේ පළමු පන්තියේ ගෞරව උපාධිධාරිනියකි. ඇයගේ විෂය වී ඇත්තේ ජනමාධ්‍ය හා සන්නිවේදනයයි. පෞද්ගලික ආයතන කිහිපයක නීතිඥවරියකද ලෙස සේවය කර ඇති ඇය සුප්‍රසිද්ධ බාක්ලේස් සහ ලන්ඩනයේ ‘ස්කොට්ලන්ත රාජකීය බැංකුව’ වෙනුවෙන්ද සේවය ලබා දී ඇත. ඇයගේ වෘත්තීය ජීවිතය පුරාවට අවදානමට ලක්විය හැකි ප්‍රජාවන් (විශේෂයෙන්ම කාන්තාවන්) වෙනුවෙන් සුවිශේෂී සේවාවන් රැසක් ඉටු කොට තිබේ.