බුද්ධි අංශයෙන් ලද තොරතුරකට අනුව යුධ හමුදා භට පිරිස් විසින් නීතිවිරෝධි ලෙස ප්‍රවාහනය කරමින් තිබු කහ කිලෝග්‍රෑම් 205.7 ක් සහ කේරළ ගංජා කිලෝග්‍රෑම් 104 ක් සමග සැකකරුවන් සිව්දෙනෙකු ඊයේ සවස අත්අඩංගුවට ගෙන තිබෙනවා.
මැදවච්චිය-මන්නාරම මාර්ගයේ 543 වන බලසේනාවේ මාර්ග බාධකයක් හසුරුවමින් සිටි විජයබාහු පාබල රෙජිමේන්තුවේ භටපිරිස් විසින්කුඩා ලොරි රථයක් (ඩිමෝ බට්ටා) නවතා සෝදිසි කිරීමේදී ලක්ෂ 8.2 ක පමණ වටිනාකමින් යුත් කහ තොගයක් සමඟ සැකකරුවන් දෙදෙනෙකු ඊයේ දින සවස 6.30 ට පමණ අත්අඩංගුවට ගෙන තිබේ.
එමෙන්ම, කුන්චිකුලම් මාර්ග බාධකයේ රාජකාරී කල 54 වන සේනාංකය යටතේ ස්ථාපිත 542 වන බලසේනාවට අයත් 15 වන (ස්වේච්ඡා) ගැමුණු හේවා බළඇණියේ භටපිරිස් සැකකරුවන් දෙදෙනෙකු සමග කේරළ ගංජා කිලෝග්‍රෑම් 104 ක තොගයක් අත්අඩංගුවට ගෙන ඇත. මෙම කේරළ ගංජා තොගය මන්නාරම් සිට වෙනත් ප්‍රදේශයකට ශීතකරණයක් සහිත වාහනයකින් ප්‍රවාහනය කරමින් සිටියදී සැකකරුවන් දෙදෙනා සමඟ රුපියල් මිලියන 20.8 වටිනාකමින් යුත් ගංජා තොගය අත්අඩංගුවට ගෙන ඇත.