මන්නාරම සමූහ මිනිවලේ අස්ථි සාම්පල සම්බන්ධයෙන් අමෙරිකාවේ ෆ්ලොරිඩා රසායනාගාරය ලබා දී ඇති වාර්තාවේ ඇතැම් කරුණු පිළිගත නොහැකි බව කැළණිය විශ්වවිද්‍යාලයේ පුරාවිද්‍යාව පිළිබඳ මහාචාර්ය රාජ් සෝමදේව මහතා පවසනවා.
එම වාර්තා පෙන්වා දෙන්නේ, මෙම අස්ථි සාම්පල මීට වසර 231 කට පෙර මිය ගිය පිරිසකගේ බවයි.
අදාළ මිනිවල සම්බන්ධයෙන් පරිපූර්ණ විද්‍යාත්මක වාර්තාවක් ලබාදෙන ලෙස මන්නාරම මහේස්ත්‍රාත් අධිකරණය තමන් වෙත දැනුම් දීමක් සිදුකළ බවද රාජ් සෝමදේව මහතා ප්‍රකාශ කළා.
එම පරීක්ෂණ සඳහා අවශ්‍ය අධිකරණ භාරයේ තිබූ අස්ථි කොටස්ද තමන් වෙත නිදහස් කළ බවයි ඒ මහතා කියාසිටියේ.
අධිකරණයේ ඉල්ලීම් අනුව මන්නාරම මිනිවල සම්බන්ධයෙන් පුළුල් පරීක්ෂණයක් සිදුකර ඒ පිළිබඳ වාර්තාව ජූලි මස 31 වනදාට පෙර භාර දීමට කටයුතු කරන බව මහාචාර්ය රාජ් සෝමදේව මහතා ප්‍රකාශ කළා.
2018 වසරේ මාර්තු 26 වනදා මන්නාරම මිනිවල පිළිබඳ පළමු වරට තොරතුරු අනාවරණ කළා.
ඒ අනුව, මේ දක්වා එහි සිදුකළ කැණීම්වලින් මිනිස් සිරුරු 342 කට අයත් අස්ථි කොටස් හමු වී තිබෙනවා