ළමා හා ස්ත්‍රී දූෂකයන්ට මරණ දඩුවම ලබා දීම වෙනුවට ඔවුන්ගේ පුරුෂ ශක්තිය සිදීම වැනි දෙයක් වඩාත් උචිත බවට පාර්ලිමේන්තු මන්ත්‍රී වාසුදේව නානායක්කාර මහතා ඉකුත් දා පැවති විවාදයකදී ප්‍රකාශ කර තිබුණා. එවැනිම යෝජනාවක් ඉන්දීය අධිකරණයක් මගින්ද ඉදිරිපත් වී තිබෙනවා.
ළමා අපචාර මැඩලීමට පවතින නීති අසමැත් බැවින් ළමා දූෂකයන්ගේ පුරුෂ ශක්තිය බෙලහීන කිරීමට පියවර ගත යුතු බව මදුරාසි මහාධිකරණ විනිසුරු එන් කිරුබාකරන් ප්‍රකාශ කර තිබෙනවා. විනිසුරුවරයා මේ බව ප්‍රකාශ කර තිබෙන්නේ පිරිමි දරුවෙකු අපයෝජනය කළ බවට චෝදනා ලැබ සිටින බ්‍රිතාන්‍ය ජාතිකයෙකු ඉදිරිපත් කළ අභියාචනාවක් ප්‍රතික්ෂේප කරමින්.
වර්තමානය වන විට සමූහ ළමා දූෂණ ඉන්දියාව පුරා අසන්නට ලැබෙන බව පැවසූ විනිසුරු එන් කිරුබාකරන් ‘එවැනි තර්ජනයන්ට විසඳුම් ලබා දීමට නීතිය අසමත් නම්, උසාවියට බෑ කර බාගෙන නිහඬව, නොසෙල්වී බලා ඉන්න’ යනුවෙන් පවසා ඇත. ‘ළමා දූෂකයන්ගේ පුරුෂ ශක්තිය බෙලහීන කිරීමට කටයුතු කළොත් ඉන් ඓශ්වර්යමත් ප්‍රතිඵල ලැබෙනු ඇති බව අධිකරණයට විශ්වාසයෙන් කියන්න පුළුවන්’ විනිසුරුවරයා වැඩිදුරටත් පවසා ඇත.
දිල්ලි අගනුවරදී විශ්ව විද්‍යාල සිසුවියක් අමානුෂික ලෙස සමූහ දූෂණයට ලක්කොට ඝාතනය කිරීමත් සමග ලිංගික ප්‍රචන්ඩත්වයට එරෙහිව පවතින නීති තර කිරීමට ඉන්දීය රජය පියවර ගත්තේ දෙවසරකට ඉහතදීයි. එනමුත් කාන්තාවන්ට සහ දරුවන්ට එරෙහිව සිදු කෙරෙන ලිංගි ප්‍රචණ්ඩ ක්‍රියා නිරන්තරයෙන්ම ඉන්දියාවේ නන් දෙසින් වාර්තා වේ.