යෝජිත සිංගප්පූරු වෙළෙඳ ගිවිසුම මඟින් ශ්‍රී ලංකාවට, ආනයනික බදු ආදායම ලෙස පමණක් රුපියල් මිලියන 1,600ක් අහිමි වන බව, තොරතුරු තාක්ෂණ වෘත්තීයවේදීන්ගේ සංසදයේ ලේකම් ලසන්ත වික්‍රමසිංහ මහතා පැවැසීය.
ඒ අනුව අදාළ වෙළෙඳ ගිවිසුම සම්බන්ධයෙන් මලික් සමරවික්‍රම අමාත්‍යවරයා කරන ප්‍රකාශ සම්පූර්ණ අසත්‍ය බවත්, ඔහු රටට බොරු කරමින් සිංගප්පූරු ගිවිසුම ආරක්ෂා කොට, මේ රට ජාත්‍යන්තරයට බිලි දීමේ න්‍යාය පත්‍රය ක්‍රියාත්මක කරන බවත්, ඔහු සඳහන් කළේය.
තොරතුරු තාක්ෂණ වෘත්තීයවේදීන්ගේ සංසදය පෙරේදා (07දා) කොළඹදී පැවැත්වූ මාධ්‍ය හමුවකට එක්වෙමින් ඔහු මේ බව සඳහන් කළේය.මෙම ගිවිසුම නිසා සිංගප්පූරුවට ඇමෙරිකානු ඩොලර් මිලියන දහයක ආනයනික බදු ආදායමක් ඉතිරි වන බව සිංගප්පූරු වෙළෙඳ හා කර්මාන්ත අමාත්‍යවරයා විසින් නිකුªත් කළ නිවේදනයක සඳහන් වන බවත්, ඒ අනුව මේ ගිවිසුම නිසා ශ්‍රී ලංකාවට ආනයනික බදු ආදායම ලෙස රුපියල් මිලියන 1600ක ප්‍රමාණයක් වර්ෂයකට අහිමි වන බවත් ඔහු සඳහන් කළේය.
මෙම ගිවිසුම මඟින් ශ්‍රී ලංකාවෙන් සිංගප්පූරුවට අපනයනය කරන භාණ්ඩවලින් බදු සහන ලැබෙන එක් භාණ්ඩයක් හෝ නම් කරන ලෙස ඔහු අමාත්‍යවරායාට අභියෝග කළේය.