තඹුත්තේ පොලිසියට ගල් මුල් ප්‍රහාර එල්ල කරමින් කලහකාරී ලෙස හැසිරීමේ චෝදනා මත අත්අඩංගුවට ගත් පුද්ගලයින් 57 දෙනෙකු ලබන මස 05 වන දා දක්වා රක්ෂිත බන්ධනාගාරගත කර තිබේ.
පොලීසිය පැවසුවේ, ඔවුන් ඊයේ රාත්‍රි තඹුත්තේගම මහේස්ත්‍රාත්වරිය හමුවට ඉදිරිපත් කිරීමෙන් පසු එලෙස රක්ෂිත බන්ධනාගාරගත කළ බවයි. රක්ෂිත බන්ධනාගාරගත කළ පිරිස අතර කාන්තාවන් 5 දෙනෙකු ද වේ.
ඊයේ පස්වරුවේ රාජාංගනය පොලීසියට මෙම පිරිස ගල් මුල් ප්‍රහාර එල්ල කළේ, මාර්ගය අවහිර කරමින් පැවති උද්ඝෝෂණයක් විසුරුවා හැරීමට උත්සාහ කිරීමත් සමග ය.
රාජාංගනය ජලාශයේ දියවරින් පෝෂණය වන ප්‍රදේශ රැසක ගොවි ජනතාව ඊයේ පෙරවරුවේ කලා ඔය පාලම අසළ විරෝධාතාවක් ආරම්භ කර ඇත.
ඒ, ජලාශයේ ජලය, චීන පෞද්ගලික සමාගමක ව්‍යාපෘතියකට ලබාදීමට ගෙන ඇති තීරණයට විරෝධය පළ කරමිනි.
අනතුරුව ඔවුන් මාර්ග අවහිර කරමින් විරෝධතාවයේ නිරතවීමත් සමග පොලීසිය එම පිරිස විසුරුවා හැරීමට කටයුතු කළේ ය.