රාජපක්ෂ පාලන සමයේදී සිදුවූ බැඳුම්කර ගනුදෙනු සම්බන්ධයෙන් විමර්ශනය කිරීම සඳහා ද විශේෂ ජනාධිපති කොමිසමක් පත් කරන බව සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේනාරත්න මහතා පවසයි.
පසුගිය රජය සමයේ සිදුකළ බැඳුම්කර මගඩි හරහා රජයට අහිමි වී ඇති මුදල රුපියල් බිලියන 4000 ඉක්මවන බවයි ඇමතිවරයා පවසන්නේ. එවැනි බරපතල වංචාවලට සම්බන්ධ පුද්ගලයන් දැන් වත්මන් රජය යටතේ සිදු වූ බිලියන 11 ක වංචාව පිළිබඳ මහා ඉහළින් කතා කරන බව ද සේනාරත්න මහතා පෙන්වා දෙයි. එම බිලියන 11 ක මුදල රජයට අයකර ගත යුතු බවට කිසිදු ගැටලුවක් නොමැති බවත් එසේම පැවති
රජය යටතේ සිදු වූ බැඳුම්කර වංචා සම්බන්ධයෙන් විමර්ශන සිදුකර එම මුදල් වංචාවලට සම්බන්ධ පුද්ගලයන්ට එරෙහිව නීතිය ක්‍රියාත්මක කළයුතු බවත් ඇමතිවරයා අවධාරණය කරයි.
මේ වනවිට බැඳුම්කර වංචාවේ ප්‍රධාන පාර්ශ්වයක් වන අර්ජුන් ඇලෝසියස්ට අයත් රුපියල් බිලියන 12 ක් මහ බැංකුව විසින් රඳවාගෙන සිටින බැවින් එම මුදල් අයකර ගැනීම පිළිබඳව කිසිදු ගැටලුවක් නොමැති බව ද ඇමතිවරයා පවසයි.
කළුතර ප්‍රදේශයේ පැවති උත්සවයක් අමතමින් අමාත්‍යවරයා මේ බව කියා සිටියේය.