යුද හමුදා සන්නාහ සන්නද්ධ බලකායට අයත් අනුරාධපුර කලත්තෑව කඳවුරේ අවි ගබඩාවේ මුද්‍රා කර තිබූ දොරගුළු බිද ටී – 56 වර්ගයේ ස්වයංක්‍රීය ගිනි අවි දෙකක් පැහරගෙන ගොස් ඇති බව එම කදවුරේ උසස් නිලධාරියෙකු අනුරාධපුර පොලීසියට ඊයේ 12 පැමිණිල්ලක් ඉදිරිපත් කර තිබෙනවා.
කඳවුරේ සෙබළකු විසින්ම එම සොරකම සිදුකරන්නට ඇති බවට පොලිසිය සැක පහළ කරයි. දැඩි ආරක්ෂිත කඳවුරක් වන මෙම ස්ථානයට පිටස්තර අයකුට කිසිසේත් ඇතුළුවීම අපහසු බව පොලිසිය අනාවරණය කරගෙන ඇත. විශේෂ අවි ගබඩාවේ ආරක්ෂිතව ගබඩා කර ඇති අවි ආයුධ අත්‍යවශ්‍ය කටයුත්තකදී පමණක් භාවිතයට ගන්නා අතර පසුගිය 28දා වැනිදා දිනයේ අවසන් වරට එහි අවි භාවිතයට ගෙන සුරක්ෂිතව ගබඩා කර විශාල අගුලක් දමා මුද්‍රා කර තිබී ඇති බව පැවසේ.
එම කඳවුරේ අණදෙන නිලධාරීවරයාගේ නියෝග මත කිසිදු නිලධාරියකු කිසිදු සෙබළකුට කඳවුරෙන් පිටවීම තහනම් කර ඇති අතර, ගිනි අවි දෙක සොරා ගැනීම සම්බන්ධයෙන් යුද හමුදා විනයාරක්ෂක පොලිසිය (මිලිටරි පොලිසිය) වෙනම පරීක්ෂණයක් ආරම්භ කර තිබේ.