අප්‍රේල් 25 වනදා සිදුවන අග්‍රාමාත්‍ය රනිල් වික්‍රමසිංහ මහතාගේ ඉන්දීය සංචාරයේදී ත්‍රිකුණාමල වරාය සහ තවත් වැදගත් ගිවිසුම් කිහිපයක් ගැන සාකච්ඡා කිරීමට නියමිත බව ඉන්දීය මාධ්‍ය පවසයි.
ත්‍රිකුණාමල වරාය සංවර්ධනයට අදාල ඉන්ධන ගබඩාව, ස්වාභාවික වායු බලාගාරය, ගෑස් නල ව්‍යාපෘතිය සම්බන්ධ ගිවිසුම්වලට මෙහිදී අත්සන් තබනු ඇති බවයි “ද හින්දු“ පුවත්පත සදහන් කරන්නේ.
එමෙන්ම දකුණු ආසියාතික අධිවේගී මාර්ගය සහ කර්මාන්තපුර සංකීර්ණයේ හුවමාරු මධ්‍යස්ථානයක් ලෙස ත්‍රිකුණාමල වරාය සංවර්ධනය පිළිබදව සහ යෝජිත ඉන්දු ලංකා ‘එට්කා‘ ගිවිසුම පිළිබදවද අග්‍රාමාත්‍යවරයා ඉන්දීය සංචාරයේදී අදහස් හුවමාරු කර ගැනීමට නියමිතය.
එම සංචාරයේදී ඉන්දීය විදේශ ඇමති සුෂ්මා ස්වරාජ්, ස්වදේශ කටයුතු ඇමති රානාත් සිං සහ ප්‍රවාහන ඇමති නිතින් ගඩ්කාරි සමගද අගමැතිවරයා සාකච්චා කිරීමට නියමිත බව හින්දු පුවත්පත පවසයි.