හම්බන්තොට වරාය ප්‍රතිව්‍යුහකරණය කිරීමට අදාළ අනුග්‍රාහක ගිවිසුම සකස් කොට ක්‍රියාවට නැංවීම සඳහා පත්කර ඇති අනුකමිටු සාමාජිකත්වයෙන් ඇමැති පාඨලී චම්පික රණවක මහතා ඉවත්වීමට සූදානම් වන බව රජයේ ආරංචි මාර්ග පවසයි.
ඇමති ආචාර්ය සරත් අමුණුගම මහතාගේ සභාපතීත්වයෙන් පත්කර ඇති මෙම අනුකමිටුවේ සෙසු සාමාජිකයින් ලෙස මලික් සමරවික්‍රම, අර්ජුන රණතුංග, සුසිල් ප්‍රේමජයන්ත, පාඨලී චම්පික රණවක, මහින්ද අමරවීර සහ සාගල රත්නායක අමාත්‍යවරු සිටිති.
මේ අතර ජනාධිපතිවරයා විසින් පත්කරන ලද කැබිනට් අනු කමිටුවේ තීරණය ඒමටද පෙර, හොර රහසේ වරාය ගිවිසුම අත්සන් කර ඇති බව පාර්ලිමේන්තු මන්ත්‍රී වාසුදේව නානායක්කාර මහතා චෝදනා කරයි.
ජනාධිපතිවරයා විසින් පත් කරන ලද කැබිනට් අනුකමිටුවේ තීරණය ඒමටද පෙර මෙවන් තීරණයක් ගැනීම දේශපාලන අර්බුදයක් දක්වා පරිවර්තනය වනු ඇති බවද මන්ත‍්‍රීවරයා කොළඹදී පැවති මාධ්‍ය හමුවක් අමතමින් කියා සිටියේය.