විකෘති කරන ලද ඡන්ද ක්‍රමයකට මැතිවරණය පවත්වනනේ නම් තම පක්ෂය පළාත් පාලන මැතිවරණයට එක් නොවන බව ජනතා විමුක්ති පෙරමුණේ නායක අනුර කුමාර දිසානායක මහතා පැවැසීය. එසේම ප්‍රධාන පක්ෂ දෙක හැරෙන්නට අනෙක් සියලු පක්ෂ දේශපාලනයෙන් ඉවත්කිරීමට මැතිවරණ ක්‍රමයෙන් සැලසුම් කරමින් තිබෙන බවත් ඔහු පැවැසීය.
නව ඡන්ද ක්‍රමය හඳුන්වාදීමට යන්නේ ප්‍රධාන පක්ෂ දෙකේ බලය තහවුරු කර ගැනිමට බවත් පළාත් පාලන මැතිවරණය කල් දමමින් තිබෙන්නේ ශ්‍රී ලංකා නිදහස් පක්ෂයේ බෙදීම විසදා ගැනිමට බවත් ඔහු පැවැසීය.
ජනතාවට පළාත් පාලන පහිටුවා ගැනීමට ඇති අයිතය රජය විසින් උදුරාගෙන ඇති බවත් ඔහු පාර්ලිමේන්තුවේදී පැවැසීය. අලුත් ව්‍යවස්ථාව සමග නව ඡන්ද ක්‍රමයක් හඳුන්වාදිය හැකි බවත් සෑම පක්ෂයක්ම ආරක්ෂාවන පරිදි ඡන්ද ක්‍රමයක් පිළිබඳව සාකච්ඡා පවත්වා ඇති බවත් එයට අගමැතිවරයාද එකග වී අැති බවත් ඔහු පැවැසීය.
පසුගිය ආණ්ඩුවේ ආර්ථික සංවර්ධන අමාත්‍යාංශය හඳුන්වාදුන් මැතිවරණ ක්‍රමය යටතේ මැතිවරණය නොපවත්වා පැරණි ක්‍රමය යටතේ පළාත් පාලන මැතිවරණය පැවැත්විය යුතු බවද ඔහු පැවැසීය.