විවිධ ස්ථානවල ගබඩා කර ඇති, ත්‍රිවිධ හමුදාවට අයත් පුපුරණ ද්‍රව්‍ය සහ බර අවි ගබඩා කිරීම සදහා ජාත්‍යන්තර ප්‍රමිතීන්ට අනුකූල විධිමත් ගබඩා සංකීර්ණයක් අනුරාධපුර දිස්ත්‍රික්කයේ ඔයාමඩුවේ ඉදිකිරීමට ඇමති මණ්ඩල අනුමැතිය හිමිව තිබේ.
ජනාධිපති මෛත්‍රීපාල සිරිසේන මහතා විසින් මෙම යෝජනාව කැබිනට් මණ්ඩලයට ඉදිරිපත් කර ඇත.
උතුරු නැගෙනහිර හමුදා මෙහෙයුම් පැවති කාලය තුළ ක්‍රියාන්විත කටයුතු සදහා භාවිතා කරන ලද පතරොම් හා වෙඩි ද්‍රව්‍ය විවිධ ස්ථානවල තාවකාලිකව ගබඩා කරන ලද අතර, ඒවා නිසි පරිදි ජාත්‍යන්තර ප්‍රමිතීන්ට අනුකූලව ගබඩා කිරීම සදහා විධිමත් ගබඩා සංකීර්ණයක් ජනාකීර්ණ නොවූ පෙදෙසක ඉදිකිරීමට 2011 වර්ෂයේදීද අමාත්‍ය මණ්ඩල අනුමැතිය හිමිව තිබේ.
පසුගිදා ශාලාව කදවුරේ පවත්වාගෙන ගිය යුද හමුදා මධ්‍යම උණ්ඩ ගබඩාව පිපිරී විනාශවීමත් සමග නැවත වරත් අවි ගබඩා කිරීම සම්බන්ධයෙන් කතා බහට ලක්විය.