මහනුවර ඇසළ පෙරහැර මංගල්‍යෙය් දළදා කරඩුව වැඩමිවීම සදහා සිටින්නේ පරිනත දළ ඇතුන් තිදෙනෙකු පමණක් බවත් ඔවුන්ගෙන් පසු පෙරහැර කරඩුව වැඩමවීමේ අර්බුධයක් නිසැකවම හටගන්නා බවත් ශ්‍රී දළදා මාළිගාවේ දියවඩන නිළමේ නිලංග දෑල මහතා පවසයි.
මෙවර ඇසළ පෙරහැර මංගල්‍ය පිළිබදව මාධ්‍ය දැනුවත් කිරීම සදහා ඊයේ දළදා මාළිගයේදී පැවති සාකඡ්චාවකදීයි ඔහු මේ බව කියා සිටියේ.
ඉන්දිරාජා, නැදුන්ගමුවේ රාජා සහ කතරගම වාසනා යන දළ ඇතුන් තිදෙනාට අමතරව මිල්ලන්ගොඩ පොඩි රාජා සිටියත් එම ඇතා මදකිපී ඇති බැවින් පෙරහැරේ ගෙන යා නොහැකි බවද දියවඩනා නිළමේවරයා මෙහිදී සදහන් කර සිටියා.
කරඬුව වැඩම කරවීම සඳහා අඩි 09ක් පමණ උස අවුරුදු 35 – 40 වයසේ පසුවන සද්ධන්ත දළ ඇතෙකු අවශ්‍යය බවත් දෑලේ ගමන් කිරීම සඳහා එම ප්‍රමාණයේම දළ ඇතුන් දෙදෙනෙක් අවශ්‍යය බවත් පැවසූ ඒ මහතා දැනට පවතින තත්ත්වය අනුව මෙම ගැටළුවලට විසඳුමක් වශයෙන් පරිණත දළ ඇතුන් කිහිපදෙනෙකු ඉතා ඉක්මනින් ඉන්දියාවෙන් ගෙන ආ යුතුව ඇති බව ද ඔහු අවධාරණය කර සිටියේය.
හීලෑ අලි ඇතුන් හිගයට පිළියමක් වශයෙන් පෙරහැර සදහා පින්නවල අලි ඇතුන් ලබා ගැනීම කෙරෙහි රජයේ අවධානය යොමුවී ඇතත්, පෙරහර මංගල්‍යයට යොදාගත යුත්තේ හොඳින් පුහුණවලත් අලි ඇතුන් බවත් බෙරහඬට, පන්දම් එළියට, වාහන ශබ්දයට හොඳින් හුරුවූවන බවත් සඳහන් කළ නිලමේවරයා වැඩිදුරටත් සඳහන් කළේ මෙවර පෙරහරට පින්නවල අලි ඇතුන් යොදාගැනීම කිසිසේත්ම කළ නොහැක්කක් බවය.