පාර්ලිමේන්තු මන්ත්‍රී ආරුමුගම් තොණ්‌ඩමන් මහතාගේ නායකත්වයෙන් යුතු ලංකා වතු කම්කරු කොංග්‍රසය ලබන සතියේදී ආණ්‌ඩුව සමඟ එක්‌වීමට නියමිත යෑයි ආණ්ඩුවේ ජ්‍යෙෂ්ඨ ඇමැතිවරයෙක්‌ පැවසීය.
ඒ අනුව තොණ්‌ඩමන් මහතාට යහපාලන රජයේ කැබිනට්‌ ඇමැති ධුරයක්‌ ද හිමිවනු ඇති අතර එම පක්‍ෂයේ පාර්ලිමේන්තු මන්ත්‍රී මුත්තු සිවලිංගම් මහතාට නියෝජ්‍ය ඇමැති ධුරයක්‌ ද හිමිවනු ඇතැයි ඉහත ඇමැතිවරයා සඳහන් කළේය.
මේ සම්බන්ධව තොණ්‌ඩමන් මහතා ඇතුළු නියෝජිතයන් කිහිප දෙනකු මෙම සතියේදී ජනාධිපති මෛත්‍රිපාල සිරිසේන මහතා මුණගැසී විශේෂ සාකච්ඡාවක්‌ ද පවත්වනු ඇත.
එහිදී රජයට එක්‌වීම, ඉදිරි වැඩ කටයුතු ඇතුළු කරුණු රැසක්‌ පිළිබඳව අවසන් එකඟතාවකට පැමිණෙනු ඇතැයි ද එම ඇමැතිවරයා වැඩිදුරටත් පැවසීය.
(දිවයින)