ජනතා ගැටළුවලට විසදුම් දීම අමතක කර ඇති වත්මන් රජය සිය ප්‍රමුඛතම කාර්යය කරගෙන ඇත්තේ පලිගැනීම බව හිටපු ජනාධිපති මහින්ද රාජපක්ෂ මහතා පවසයි. පෙරේදා (28) දිවුලපිටිය මුනින්දාරාම විහාරස්ථානයේදී පැවති උත්සවයක් අමතමිනුයි හිටපු ජනාධිපති මහින්ද රාජපක්ෂ මහතා මේ බව සදහන් කළේ.
පන්සල් හැදීම සදහා මුදල් වියදම් කරේ කාගේ උවමනාවටදැයි අසමින් පසුගිය රජයේ දේශපාලකයන් ගෙන්වා පැය ගණන් ප්‍රශ්න කරන බවත්, එවැනි ප්‍රශ්න ඇසීමට තරම් මේ රජය බංකොලොත් වී ඇති බවත් හිටපු ජනාධිපතිවරයා එහිදී පැවසීය.
දිවුලපිටිය හල්පේ මුනින්දාරම විහාරස්ථානයේ අභිනවයෙන් ඉදිකරන ලද ධාතු මන්දිරය සහිත දෙමහල් සංගාවාසය විවෘත කිරීමේ පිංකම මහින්ද රාජපක්ෂ මහතාගේ ප්‍රධානත්වයෙන් පැවැත්විණි. අතිපූජ්‍ය නාපනේ පේමසිරි නායක ස්වාමින් වහන්සේ ප්‍රධාන මහා සංඝ රත්නයත්, දේශපාලන නියෝජිතයින් හා විශාල පිරිසක් මේ පිංකම සදහා එක්වී සිටියහ.