ජපානයේ නයෝගාහි ජී 7 ලෝක නායක සමුළුවට සහභාගි වෙමින් සිටින ජනාධිපති මෛත්‍රිපාල සිරිසේන මහතා ප්‍රමුඛ ශ්‍රි ලංකා නියෝජිතයින් අපහසුතාවට පත් කිරීමටත්, ශ්‍රි ලංකාව සම්බන්ධයෙන් වැරදි චිත්‍රයක් පෙන්වීමටත් ත්‍රිකුණාමලයේ සාම්පුර් මහා විද්‍යාලයේ ඇති වු සිද්ධිය මුල් කැර ගනිමින් සැලසුම් සහගත වැඩ පිළිවෙළක් තිබුණේදැයි සොයා බලන ලෙස අගමැති රනිල් වික්‍රමසිංහ මහතා ආරක්ෂක ප්‍රධානීන්ට ඊ‍යේ (27) නියෝග කර ඇත.
නැ‍ඟෙනහිර මහ ඇමැති මුල් කැර ගනිමින් ත්‍රිකුණාමලය සාම්පුර් සිද්ධියට නොයකුත් අර්ථකතන දෙමින් අන්තර්ජාලය ඔස්සේ ප්‍රකාශයට පත් කෙරෙන සියලු වාර්තාද අදාළ පරීක්ෂණ සඳහා යොදා ගන්නා ලෙසද අගමැතිවරයා උපදෙස් දී තිබේ.
ත්‍රිකුණාමලය සාම්පුර් සිද්ධිය සම්බන්ධයෙන් මේ වන විට අගමැති වික්‍රමසිංහ මහතා නැ‍ඟෙනහිර මහ ඇමැති හෆිස් නසිර් අහමඩ් මහතාගෙන් මෙන්ම නාවික හමුදාපති රවින්ද්‍ර විජේගුණරත්න මහතාගෙන් වෙන වෙනම වාර්තා කැඳවා තිබෙන අතර ඒවා පදනම් කැර ගනිමින් ජනාධිපති මෛත්‍රිපාල සිරිසේන මහතා හා සාකච්ජා කිරීමෙන් පසුව සිද්ධියට අදාළව තීරණ ප්‍රකාශයට පත් කිරීමටද නියමිතය.