සිදුවූ ආපදා තත්ත්වයේදී ජනමාධ්‍ය,මහා සංඝරත්නය,හා පුරවැසි සංවිධාන නොසිටියේනම් පීඩාවට පත්වූ ජනයා මේවන විට මරණයට පත්ව ඇති බව පූජ්‍ය ඉත්තෑපානේ සද්ධාතිස්ස හිමි පවසයි.
එම නිමා පීඩාවට පත් ජනයාට සේවය කළ මේ සියලුදෙනාටම තමන් පිං දෙන බව උන්වහන්සේ කියා සිටියේ ඊයේ(23)නාරාහේන්පිට අභයාරාමයේ පැවති මාධ්‍ය හමුවකදීය.
දැන් දැන් වෙද්දී රජයේ යම් යම් මැදිහත්වීම් දක්නට ලැබුණද මුලාරම්භයේ කිසිදු ශක්තියක් පෙන්නුම් නොකළ බව සද්ධාතිස්ස හිමියන් මෙහිදී පෙන්වා දුන්නේය.
අවම වශයෙන් ඒ ඒ ප්‍රදේශවල කොයි කොයි තරමින් පිරිස් අවතැන්වී සිටීද,ඒ ඒ අයට අවශ්‍ය වන්නේ මොනවාද යන්න පිළිබඳ හෝ කිසිදු තක්සේරුවක් නොතිබුණු බව උන්වහන්සේ සඳහන් කළේය.
මෙවැනි අවස්ථාවල ප්‍රසන්න සෝලංගආරච්චි නම් දේශපාලනඥයා මිනිසුන් විසින් ගෙන ගිය ආධාර අංගොඩ හංදියේ මග ඇහිරෙන ලෙස විශාල හට් එකක් සාදා මිනිසුන්ගෙන් ඒවා ලබාගෙන තමන්ගේ නම ගසා තමන් පරිත්‍යාග කරන ලෙස පෙන්නමින් ගොං වැඩ කළ බවද උන්වහන්සේ කියා සිටියේය.