සහල් මෝල් හිමියන් අවබෝධයෙන් කටයුතු කරන්නට සූදානම් නොමැතිනම් ඔවුන් සම්බන්ධයෙන් නීතිමය පියවර ගැනීමට සූදානම් බව ජනාධිපති අනුර කුමාර දිසානායක පැවැසීය.
ජනාධිපතිවරයා මේ බව සඳහන් කළේ පොළොන්නරුවේ පැවැති ජාතික ජන බලවේග මැතිවරණ ප්‍රචාරක රැලියේ දීය.
ජනාධිපතිවරයා මෙසේ ද කීවේය.
ජනතාවගේ මූලික වුවමනාවන් ඉටු කරන බවට අපි සහතික වෙනවා. මේ වෙලාවෙ තියෙන්නේ විපක්ෂ කතා නෙමෙයි. බලවත් ආණ්ඩුවක් හදන්න ඕනෑ. ඉදිරියේ දී තීන්දු තීරණ රැසක් ගත යුතුව තිබෙනවා. ඊයේ මම සහල් මෝල් හිමියන් සමග සාකච්ඡාවක් පැවැත්වූවා. අපි ඔවුන්ට කිව්වා අවබෝධයෙන් වැඩ කරන්න ලෑස්තියි කියලා. හැබැයි ඔවුන් අවබෝධයෙන් වැඩ කරන්න ලෑස්ති නැත්නම් අපි නීතියෙන් වැඩ කරන්නත් ලෑස්තියි කියලා ඔවුන්ට කියලා තියෙන්නේ. සංචාරක කර්මාන්තයට අවශ්‍ය සහල් හැර වෙනත් කිසිදු සහල් වර්ගයක් අපි ආනයනය කරන්නේ නැහැ. ඕගොල්ලො කුඹුරට බහින්න. හෙක්ටයාරයකට දුන් රුපියල් පහළොස් දහස අපි රුපියල් විසි පන් දහස දක්වා වැඩි කරලා තියෙනවා. ජනවාරි මාසය වන විට වී මිල දී ගැනීමේ යාන්ත්‍රණය ශක්තිමත් කරනවා. ගොවි ජනතාවට ශක්තිමත් ආදායමක් ලැබෙන පරිදිමේ කෘෂිකර්ම ක්ෂේත්‍රය පරිවර්තනයකට ලක් කරන්න අපි සූදානම්.