රාජපක්ෂ පාලනය විවේචනය කිරීම නතර කර රටේ ආර්ථිකය යළි ගොඩ ගත හැකි වැඩපිළිවෙලක් සදහා අත ගැසීම වඩා සුදුසු බව ,මුදල් අමාත්‍ය රවී කරුණානායක පවසයි . ශ්‍රි ලංකාවේ වත්මන් ආර්ථික තත්වය යන මැයෙන් සංවිධානය කර තිබූ සම්මන්ත්‍රණයකට එක් වෙමින් ඔහු මේ බව කියා සිටියේය .
පැවති පාලනයේ තිබූ දුර්වලතා අවබෝධ කර ගත් ජනතාව 2015 ජනවාරි 08 වනදා රටේ ආණ්ඩු පෙරළියක් ඇති කල බවත් ඒ අවස්ථාව උපයෝගි කර ගනිමින් වඩා වැදගත් ආර්ථික වැඩපිළිවෙලක් ක්‍රියාත්මක කර ඉදිරි වසර එකහමාරක් වැනි කෙටි කාලයක් තුළදී ශ්‍රි ලංකාවේ ආර්ථිකය වඩා ශක්තිමත් තැනකට රැගෙන ආ යුතු බවද අමාත්‍යවරයා සදහන් කළේය .
වසර 30 ක කුරිරු යුද්ධයකට මුහුණ දීමෙන් පසුව රටේ ආර්ථිකය ගොඩ නැගීමේ භාර ධූර කාර්ය අප වෙත පැවරී ඇති අතරම , ඒ අභියෝගය රජයක් ලෙස කෙසේ හෝ ජයග්‍රහණය කල යුතු බවයි ඔහු පැවසුවේ . බලයට පත්වූ විගස අප දින 100 ජනතා පොරොන්දු ඉටු කල අතරම , භාණ්ඩ මිල අඩු කිරීම , වැටුප් වැඩි කිරීම , අත්‍යවශ්‍ය භාණ්ඩ මිල අඩු කිරීම ඒ අතර වන බව අමාත්‍යවරයා පෙන්වා දුන්නේය .
මේ අර්බුධකාරි තත්වයෙන් රට මුදා ගැනීමට අපට වසර 05 ක කාලයක් ඉතිරිව ඇති නමුත් ඉදිරි වසර එකහමාර තුළදී රටේ ආර්ථිකය නවී කරනය කිරීමට අපට හැකියාවක් ලැබේවි යැයි අප විශ්වාස කරන බවද අමාත්‍යවරයා අවධාරණය කර සිටියේය.
Lankaleadnews