සංචාරක වීසා මගින් ශ්‍රී ලංකාවට පැමිණ නීති විරෝධී ලෙස වෙළඳාමේ නිරත වූ ඉන්දියානු ජාතිකයන් 13 දෙනෙකු අත්අඩංගුවට ගෙන තිබෙනවා. මේ පිරිස ඊයේ (18) මඩකලපුව කාත්තන්කුඩි ප්‍රදේශයේදී වෙළඳාමේ නිරතව සිටියදී පොලිස් අත්අඩංගුවට ගත් බවයි කාත්තන්කුඩිය පොලිසිය සඳහන් කළේ.
කාත්තන්කුඩිය නගරයේ ඉන්දියානු ජාතිකයන් පිරිසක් වෙළඳාමේ නිරත වන බවට පොලිසියට තොරතුරක් ලැබුණේ ඊයේ දහවල් කාලයේදී. ඒ අනුව පොලිසිය ඔවුන් අත්අඩංගුවට ගැනීමට පියවර ගත්තා. ඔවුන් සතුව රෙදිපිළි, පාවහන් අමතරව විවිධ ඖෂධ වර්ගද තිබූ බවයි පොලිසිය පැවසුවේ. ඒවා අතර තිබුණු එක්තරා කුඩු විශේෂයක් සම්බන්ධයෙන් ඇති වූ සැකය මත වැඩිදුර පරීක්ෂණ සඳහා රස පරීක්ෂක දෙපාර්තමේන්තුව වෙත යොමුකර තිබෙනවා.
මේ පිරිස සතුව තිබූ භාණ්ඩවල ප්‍රමාණයට අනුව ඒවා බෝට්ටු මගින් මෙරටට රැගෙන ආ ඒවා බවට ද පොලිසිය සැක කරනවා. අත්අඩංගුවට ගත් පිරිස අතර කාන්තාවන් පස්දෙනෙකු ද සිටිනවා.
සැකකරුවන් අද (19) කාත්තන්කුඩිය මහේස්ත්‍රාත්වරයා හමුවට ඉදිරිපත් කිරීමටයි නියමිතයි.