මාලදිවයින් ගුවන් සේවයට අයත් ගුවන් යානයේ සහයක ගුවන් නියමුවකු ඔහු නවාතැන් ගෙන සිටි මිනුවන්ගොඩ ප්‍රදේශයේ හෝටලයේ උද්‍යානයක ඇද වැටී මීගමුව රෝහලට රැගෙන යමින් සිටියදී මියගොස් ඇතැයි කටුනායක පොලීසිය පවසයි.
මෙසේ මියගොස් ඇත්තේ 64 හැවිරිදි සහයක ගුවන් නියමුවෙකි.
මෙම ගුවන් නියමුවා මාලදිවයිනේ සිට පැමිණ රාත්‍රිය ගත කිරීම සඳහා මිනුවන්ගොඩ ප්‍රදේශයේ පිහිටි හෝටලයක නවාතැන් ගෙන සිට ඇතැයි පොලිසිය කියයි.
මොහු නවාතැන් ගෙන සිටි හෝටලයේ උද්‍යානයක වැටී සිටින අයුරු දුටු හෝටලයේ සේවකයන් වහාම එය හෝටල් කළමනාකාරීත්වයට ද දැනුම් දී හෝටලයට අයත් වාහනයකින් මීගමුව රෝහලට රැගෙන ගොස් ඇත.
වෛද්‍යවරුන් පරීක්ෂාකර බලා මොහු මියගොස් ඇති බව දැනුම් දී ඇතැයි පොලිසිය කියයි.
මෙම සහයක ගුවන් නියමු වරයාගේ පශ්චාත් මරණ පරීක්ෂණය සහ හදිසි මරණ පරීක්ෂණය පැවැත්වීමට කටුනායක පොලිසිය කටයුතු යොදා ගෙන යයි.